НЕМА ШАНСИ УКРАИНА БРЗО ДА ВЛЕЗЕ ВО НАТО Џонсон вели дека за ова Западот има зборувано со Путин
Сите отсекогаш велеа и ние јасно му ставивме до знаење на Путин дека нема шанси Украина наскоро да се приклучи на НАТО, признал британскиот премиер.
Британскиот премиер Борис Џонсон призна дека „сите отсекогаш велеа и ние јасно му ставивме до знаење на Путин дека нема шанси Украина наскоро да се приклучи на НАТО“, пренесува СкајЊуз. Оваа изјава доаѓа по неодамнешната онлајн-средба на Џонсон и останати западни сојузници со украинскиот претседател Володимир Зеленски.
– Пак разговарав со Володимир вчера и секако сфаќам што тој вели за НАТО и за реалноста на таквиот став – изјави Џонсон.
На средбата, Зеленски предложил пред сојузниците Украина да се откаже од својата кандидатура за НАТО, што е клучното барање на Русија. Џонсон на ова одговорил дека, одлуката за тоа треба да ја донесе Украина и нејзиниот избран лидер, а дека Велика Британија тоа ќе го поддржи.
Во меѓувреме, преговорите за прекинување на огнот меѓу Украина и Русија имаат одреден напредок. Зеленски синоќа изјави дека преговарачките позиции сега „звучат пореални“.