НЕМА САЛМОНЕЛА НА ПОВРШИНИТЕ ВО КУЈНАТА И КАЈ ЛИЦАТА КОИ ДЕЛАТ ХРАНА ВО БЕРОВСКАТА ГРАДИНКА Наскоро ќе се знае дали ја имало во храната

Нема присуство на бактеријата салмонела во мострите што ги зел Центарот за јавно здравје од Кочани кај лица и површини во детската градинка во Берово. Испитувањата од примероците покажале негативни резултати, но ќе биде потребно уште едно деноноќие за да се добијат анализите од мострите од храната.

– Претстои уште 24-часовен период за да се утврди дали во земените примероци храна има некакви траги од салмонела. Без разлика на ваквиот резултат, нашата работа овде нема да прекине, туку ќе работиме на утврдување што ја предизвикало заразата оваа зараза. Децата кои се пожалија на здравствени проблеми биле пријавени кај матичните лекари, кои ни испратија копрокултура  – изјави Гоце Серафимов, директор на Центарот за јавно здравје – Кочани.

Според епидемиолошката служба во Центарот, во зависност од тоа каде ќе биде откриено бактериско присуство на салмонела ќе се види дали има и други позитивни случаи во беровскиот регион.

Како превентивна мерка, додека целосно да завршат анализите на земените примероци храна, кујната во градинката „23 август“ во Берово ќе остане затворена.