Нема командировка без бомбардировка!

Време е да ги „начучулиме“ ушите, што би рекол другарот Заев…

Предизборна кампања е. По тежок корона протокол. Што ќе рече, останете дома и гледајте и слушајте што ви се сервира преку медиумите и на социјалните мрежи.

Пред неофицијалниот старт на кампањата, се чинеше дека можеби има некакви шанси таа да помине без емитување на т.н. бомби. Иако, за волја на вистината, токму Заев опозиционерот, со личен пример, покажа дека без бомбардировка нема командировка. Тој што сака да добие „прекоманда“ на Илинденска, а сегашните станари да ги испрати назад во патиското седиште, мора да посегне по токсичниот материјал во вид на нелегални видео и аудио снимки, со кои пазарот буквално е преплавен.  И додека опозиционерите се думаа дали да се фатат за „бомбите“, изненадно прв опали СДСМ, со онаа снимка од разговорите на Христијан Мицкоски и Зоран Милевски Кичеец.

А вети еднаш Зоки дека веќе нема да се „шири“ Пандорината кутија. Тоа е, краток фитиљ има човекот. Луѓе што го сретнале деновиве велат дека фитиљот сега дополнително му е скратен. Веројатно и на брат му, „душата напатена“. Нема веќе „чукамо се, ударамо се у градима нашима“. Сдсмовското „сидро“ е фрлено и опасно „влече напред“. Патем речено, како мала дигресија, да кажам дека во текстов цитирам заевизми (како специфичен вид новоговор во Северна Македонија), имено заради збогатување на експресивноста на изразот. Ако не пречи…

За кого и за што дава „пас“ Зоран Заев?

Трите денешни аудио-снимки, на кои главен актер е Ден Дончев, покажаа дека на Заев нема воопшто да му биде лесно. Можеби лидерот на СДСМ ќе се потруди да ја игнорира изјавата на другарот Бојан Јовановски дека парите од „Рекет“ се кај Зоран и Вице Заеви (за тоа малку подолу), но како да се игнорираат изјавите на чуварот на богатата здравствена каса, на муртинецот Ден Дончев, дека за обидот да се „спакува“ фирмата „Диамед“ имал поддршка лично од Зоки, кој му дал„пас“ кога требало и чиј пријател од финансиското разузнавање е на услуга да ја заврши работата?

Се изнасмеав кога го прочитав „објаснувањето“ на Заев за снимките во кои Дончев ја открива рекетарската шема. Цитирам: „Снимката ја видов и ќе го прашате Ден Дончев да ви каже каде е таа снимка. Втората работа ја слушнав и во аудио разговорот кој е објавен. Едно што знам, секако ќе дадам одговор откога ќе разговарам и со Ден Дончев околу деталите. Вклученост на Медарски кој се спомнува внатре, кој е мој адвокат, многу често ангажиран и од СДСМ, имало во предмет со Тотал ТВ, каде меѓу себе сопственици воделе пријави до полиција и слично и полицијата постапувала со Тотал ТВ, но секако ќе си каже и Ден Дончев, не би навлегувал во вакви лажни, манипулациски пуштања на снимки“.

Уф, уф, уф… Работава е, да цитирам уште еден прославен заевизам, бомбона за „сите оние што имаат уши, а се прават слепи“. Па што ли треба да се разбере ако се спојат кажаното во снимките и „објаснувањето“ на Заев? Дека за притисокот врз „Диамед“ бил задолжен другарот Блажо (близок до Заев, не до СДСМ, прецизен е Дончев), додека Заев дал „пас“ полицијата да настапи во некој случајо со Тотал ТВ? Патем речено, како мала дигресија, да кажам дека моите информации се дека овој пат Заев ја говори вистината за инволвираноста на Медарски, односно дека навистина во снимката се зборува за случајот „Тотал ТВ“… Но, тоа ништо суштински не менува. Заев ни должи објаснување врз основа на какво овластување давал некакви „пасови“ полицијата да интервенира во одделни случаи?!

Но, ајде да не брзаме со заклучоци, редно е да почекаме Зоки да го праша Ден и да се потсети што е она за што ломоти другарчето од Муртино. Така е тоа, кога човек подлажува наоколу, мора да има добра меморија и да запамети што кажал. Одозгора на тога, кога човек ќе фати работа со луѓе како снимачот Дончев, однапред треба да знае дека стапнал на гнила штица. Но, тоа е проблем на Заев. Мене лично ме интересира тој, ако може, да го праша другарчето Дончев кој ги снимил снимкиве, бидејќи две од трите буквално се со студиски квалитет. И да, што е онаа снимка со парите?

Каде се парите…

И ете, веќе ги спомнавме парите. Тие пусти пари… Време е да се осврнеме на веќе легендарната реплика на првостепено осудениот во аферата „Рекет“, самопрогласениот политички осуденик Бојан Јовановски, изречена во самиот финиш на процесот. Цитирам: „Парите барајте ги кај Вице и Зоран Заеви, не кај мене!“

Кога ја чув оваа изјава на идениот македонски политички лидер и визионер Јовановски (ова „визионер“ е поврзано со визирот што ја прекриваше главата на лидерот додека ја изговараше славната реплика), прво што помислив е дека станува збор за изјава дадена во афект. Си реков, а што друго можеше да се очекува во моментите кога Боки ќе се соочи со болната вистина дека Заеви целосно му свртеле грб, кога провостепениот суд ќе му ги изброи годините што треба да ги помине зад решетки? Одозгора на тога, девет се, не се малку…

Но, потоа се сепнав. Се сетив дека Бојан Јовановски мора да знаел дека не ја ужива заштитата од Заеви (на која можеби се надевал), најмалку од оној момент кога Зоки нервозно јавно го нарече „педер“ на кого нема да му дозволи да го симне од власт. Боки мора да е свесен дека му ги измеша и му ги скина сите жици на лидерот на СДСМ и дека навистина е до гуша е во една рекетарска приказна – опкружен со криминалци, адвокати и обвинители мешетари, извршители, партиски војници од пониските ешалони на СДСМ, но и новинарски бардови жедни за неговите сомнителни пари – од која не може да излезе невин.

Можно ли е овој контроверзен лик, кој наспроти својата бизарна појавност, несомнено е интелигентен дечко, со комуникациски вештини и моќ на убедување со кои апсолутно доминира на сцената што самиот ја создава, онака случајно да исфрли една ваква погубна реплика, една изјава со која може да си нанесе повеќе зло одошто добор, бидејќи ја урива главната теза на сопствената одбрана? Имено, клучната теза на неговата одбрана, водена од одличниот адвокат Дуковски, беше дека никакви пари во доказната постапка не се докажани, дека никаде не гледаме пари во рацете на Јовановски и на Јанева, дека пари едноставно нема. А сега Боки вели дека пари имало и дека тие пари требало да се бараат кај Заеви…

Можно ли е Боки да влетал во офсајд и на Заеви да им испраќа порака -ако можев да лажам во ваша полза, можам да лажам и на ваша штета?!

Не, сепак не верувам во такви случајности. Аферата „Рекет“ се менаџира од нејзиното избивање во јавноста и Зоран Заев несомнено е клучен играч во тоа менаџирање, почнувајќи од неговата првична изјава дека го пријавил случајот во Обвинителството, иако никогаш не видовме записник дека тоа навистина се случило. И ова што сега го прави Јовановски, во пресрет на новите „бомби“ кои откриваат еден друг аспект на кејсот, мислам дека не е случајно. Дали е добро обмислено, тоа веќе е друго прашање.

Како и да е, сега веќе не е битно дали Боки лаже кога вели дека парите се кај Заеви. Сега е многу поважно е дали Зоран и Вице ја говорат целата вистина и ништо помалку од неа, кога тоа го негираат. А најважно, сепак, е дали случајот „Рекет“ е целосно затворен со првостепената пресуда, или можеби токму со неа се отвора една нова димензија на овој корупциски скандал што го одбележа владеењето на СДСМ на Зоран Заев.

Убеден сум дека Апелацискиот суд нема да може да донесе квалитетна  второстепена пресуда ако не утврди дали исказот на првостепено осудениот Јовановски дека парите од „Рекет“ се кај Заеви е сериозна индиција. Освен тоа, второстепениот суд не може така лесно да ја занемари содржината на новите аудио-снимки кои се појавија на анонимни канали на интернет, чија автентичност ја потврди обвинителката Вилма Русковска и уште кажа дека снимките веќе биле пуштени во судницата без присуство на јавноста.

Каде се Димишкови во фабулата?

Случајно ли е тоа што неколку дена по пресудата и по жестокото обвинување на осудениот Јовановски на сметка на Заеви се појавија тие снимки, во кои главниот лик, адвокатот Васил Димишковски, наводно бара фантастични 6 милиони евра за некакви не сосема јасни услуги поврзани со случајот „Рекет“? Случајно ли некој пак ја „шири“ Пандорината кутија, пуста да остане?

Обвинителката Русковска во медиумите јасно и гласно кажа дека станува збор за исечоци од 57-минутен разговор меѓу Зоран Милевски Кичеец и Васил Димишков, брат на судијката Весна Димишкова, која го испрати Орце Камчев во притвор за случајот „Империја“. Многу дилеми отвораат овие нови снимки, а три прашања се најважни.

Прво, ако навистина имало три вакви снимки кои траат со часови и се меѓу адвокатот Димишков, Ана Камчева и Зоран Милевски Кичеец, останува дилемата како тие снимки протекле од Обвинителството или од Кривичниот суд во јавноста. Што е намерата на ова протекување? И треба ли и за тоа некој да одговара?

Второ, иако не е мое да судам, мора да кажам дека не ми изгледа уверливо објаснувањето дека адвокатот Димишков  во овие разговори настапил со милионска понуда до осомничените Камчеви за неговите адвокатски услуги, со цел да биде одбиен. Плусинфо не ги објави и не ги линкуваше снимките, бидејќи беа дисеминирани на начин што за нас е неприфатлив, но снимките ги објавија други медиуми. Ги преслушав повеќе пати и можам да кажам дека се стекнува прилично цврст впечаток дека се тргува за ослободување на Камчев од притвор, при што се спомнуваат разни бројки, меѓу кои и спомнатата бројка од 6 милиони евра. Не велам дека адвокатот Димишков требало да биде осомничен или обвинет, но не ми е јасно врз основа на кои аргументи се тврди дека во овие снимки нема индиции за подготовка на едно сериозно кривично дело, подоцна извршено од други актери, од осудените Бојан Јовановски и од Катица Јанева. Каде се адвокатот Димишков и судијката Димишкова во фабулата?

И трето, веќе не е клучна дилемата што да се прави сега со „Империја“. За ова деновиве се дебатираше јавно, а професорот Гордан Калајџиев, на пример, сосема оправдано и со гранитно цврсти аргументи, укажа дека практично станува збор за пропаднат кејс. Јас можам само да     дополнам дека одамна напишав дека аферата „Рекет“ целосно го искомпромитира овој случај, кој е граден без материјални докази, со еден наратив погоден само за пропагандната „борба за правдини“, во која се очекуваше судовите да постапуваат во улога на преки егзекутори на аматерските обвиненија на СЈО на Катица Јанева. Но, после најновиве бомби, дилемата што се наметнува е дали некои мешетари во правосудниот систем, во политиката и во медиумите, ја искористиле шансата да сплетат рекетарска мрежа, сметајќи на спремноста на Камчев да го одврзе ќесето за да се спаси од притвор и од едно блиц-криг судење, или можеби целиот случај намерно е исконструиран и воден на начин што идејата за некаква спогодба ќе се прикаже како легитимна и прифатлива, за потоа, под плаштот на едно такво алиби, да се рекетира и да се земат пари што ќе завршат во нечии џебови, наместо во државната каса.

Има ли уште „бомби“?

И тука пак се враќаме на спектакуларниот финиш на судењето и на репликата на Бојан Јовановски – парите барајте ги кај Вице и кај Зоран Заеви!

Чудна е оваа провокација на Јовановски. Како и да се сфати таа, Заев сепак ни должи еден потемелен одговор во врска со неа. Не се доволни неуверливите партиски соопштенија од Бихаќка, во кои се зборува за наводните конструкции на ВМРО-ДПМНЕ. Контрапродуктивни се настојувањата на Заев да избегне било какви прашања на оваа тема. Без одговор, ама вистинит, комплетен и без евтини спинови, репликата на Боки ќе остане да виси како непријатна закана, како откачена тула над портата што може да го тресне по глава оној што се обидува да ја затвори.

Знам дека е непријатно да се расправа за вакви работи среде предизборна кампања. И секако, познато е, како што вели Черчил, дека најмногу се лаже во љубовта, во лов и во предизборна кампања. Ама, не е убаво да се лаже, зашто вистината на крајот сепак победува. Тој момент што го нарекуваме „на крајот“ може да дојде и после изборите (кога вистината нема да биде битна за нивниот исход), но никој не знае што уште може да извади анонимниот профил „Алибаба Тредичи“ во текот на кампањата и дали анонимниот контрапрофил „Добриот човек“ има потенцијал да ги спаси Заеви од новите провокации, како што се обиде, објавувајќи „контраразговори“ од истиот материјал за кој зборува Русковска (добро прашање е како протекле и тие снимки).

Како и да е, кампањата неофицијално почна со бомбардировка. Дали тоа битно ќе го смени предизборното расположение на избирачите? Не верувам, но можно е новите бомби да го зацврстат уверувањето на многу луѓе дека политиката во Македонија и во време Грујово беше, но и во време Заево остана еден голем, сега дури и проширен и надграден свет од лаги, во кој сите на некој начин се чувствуваме удобно и самозадоволно и немаме преголема желба да трагаме по вистината. Ионака, како што вели Орвел, во царството на лагите, вистината е предавство.