НЕМА КОЈ НЕ Е ГРИПОСАН Процентот на заболени скокна за 41,7%

„Нови 1.675 заболувања од грип или, пак, слични на грип, се пријавени во земјава во третата недела од годинава, а тоа е 41,7% повеќе споредено со претходната седмица“, соопшти Институтот за јавно здравје.

Бројот на заболени е поголем за 47,6% споредено со минатата сезона, а зголемувањето е за 32,2% споредено со третата недела од типичната епидемиска крива (моделирана во последните 13 сезони).

Во однос на возрасната дистрибуција, 1.012 лица се на возраст од 15-64 години, 256 деца на возраст од 5-14 години, 237 деца на возраст од 0-4 години и 170 се лица на возраст над 65 години. Највисока инциденца се регистрира кај децата на возраст од 0-4 години.

Во Скопје има 295 заболени, во Битола 287, во Тетово 165, во Гостивар 149, во Дебар 110, во Куманово 104, а во останатите региони помалку од 100.

Во оваа недела е регистриран еден смртен случај асоциран со грип. Лицето било од Неготино и имало 45 години. Било хоспитализирано во КИБФС. Кај починатото лице биле утврдени коморбидитети (кардиоваскуларни болести, белодробни болести, дијабетес и обесност) и не било вакцинирано против сезонски грип. Лабораториски е потврдена Инфлуенца А (H1) pdm09.

Вкупниот број случаи на грип или, пак, заболувања слични на грип во сезоната 2023-2024 година е 5175. Споредено со истиот период од минатата сезона, се бележи зголемување од 22,3%, а во однос на моделот од последните 13 сезони, има раст од 34,6%.