НЕМА ФАЈДЕ ОД ОПШТА МОБИЛИЗАЦИЈА Руски полковник ја открива реалноста за армијата и нејзините проблеми

Зошто Владимир Путин не ја објави долгоочекуваната сеопшта мобилизација на рускиот народ „против нацистите“ на денешната парада во Москва? Поранешен руски началник од Главната оперативна управа на Генералштабот го кажа одговорот во гостување на руската државна телевизија, а тој не им се допаѓа на поддржувачите на Русија.

Според Михаил Ходаренок, со мобилизацијата нема да се постигне многу бидејќи нема доволно стручност,  модерно оружје и опрема, пишува Мондо. Уште поголема главоболка создава фактот што во Русија преовладувало мислењето дека војната може да заврши за неколку дена и дека Украинците нема да даваат отпор, лекција која Ходаренок вели дека Русите требало да ја научат уште во војната на Крим од 2014 година.

– Замислете да ги слушнете сите тие тапани, фанфари и да најавите мобилизација. Кога ќе го добиеме првиот авијациски полк? Тоа би било околу Нова година. Немаме резервен персонал, пилоти и авиони, па со мобилизација би се постигнало само малку префрлување на сила. Ако денес нарачаме да се изгради нов воен брод, знаете кога ќе го добиеме? За две години. Или на пример, сакаме нова тенковска дивизија. Би била готова за најмалку 90 дена, а и покрај сето тоа таа нема да биде опремена со модерно оружје, затоа што модерно оружје и модерна опрема ние немаме во нашите реерви. Не би било разумно да испраќаме луѓе да водат војна во 21 век со оружје што е застарено, а да се бориме со војници кои имаат оружје според стандардите на НАТО – рече Ходаренок.

Ходаренок уште на почетокот на февруари презентираше детална анализа на војната и предвиде дека Русија нема така лесно да победи. Тогаш тој напиша:

„Некои претставници на руската политичка елита денеска тврдат дека Русија е способна да ѝ нанесе огромен пораз на Украина за неколку часа (а се споменуваат и пократки периоди) доколку избие воен конфликт. Да видиме како таквите изјави кореспондираат со реалноста. Тоа е силно вкоренето кај нас, дека нема да има потреба да се испраќаат војници во Украина, бидејќи вооружените сили на земјата се во непристојна состојба, при што некои политички аналитичари нагласуваат дека силен руски огнен напад ќе ги уништи речиси сите украински системи за надзор и комуникација, артилериски и тенковски формации“.

„Голем број експерти заклучуваат дека дури и еден силен удар од Русија ќе биде доволен за да се стави крај на таквата војна. И, конечно, како шлаг на тортата, некои аналитичари го посочуваат фактот дека никој во Украина нема да го брани „киевскиот режим“. Да почнеме со последното. Да се тврди дека никој во Украина нема да го брани режимот, практично значи целосно непознавање на воено-политичката ситуација и расположението на широките маси во соседната земја. Згора на тоа, нивото на омраза (кое, како што знаете, е најефикасното гориво за вооружена борба) во соседната република во однос на Москва е искрено потценето. Никој нема да ја пречека руската војска со леб, сол и цвеќиња во Украина“, напиша Ходаренок во авторски текст за рускиот портал на невладини организации.

„Се чини“, пишува тој, „дека настаните во југоисточна Украина во 2014 година никогаш никого ништо не научиле“ и продолжува:

„Во тоа време (во 2014 година), на крајот на краиштата, се очекуваше дека делот од Украина што го сочинува нејзиниот лев брег ќе се претвори во Новоросијск за еден миг и за неколку секунди. Запорожје, Днепропетровск и Мариупол не ги поддржа ваквите планови во најголемиот број случаи. Проектот „Новорусија“ е некако незабележливо надуван и тој тивко замре. Со други зборови, ослободителниот поход од 2022 година по примерот од 1939 година, никако нема да успее. Во овој случај, зборовите на класикот на советската литература Аркадиј Гајдар се повистинити од кога било“.