НЕМА ДА СЕ ПОМЕСТАМ НИ МИЛИМЕТАР Мицкоски повтори дека се јасни неговите ставови за уставните промени

Претседателот на ВМРО-ДПМНЕ Христијан Мицкоски очекува да се засилат притисоците од дипломатите за промена на Уставот, но дека тој ниту за милиметар нема да отстапи и останува на ставот дека овој парламентарен состав нема мандат за уставни измени. Опозицискиот лидер им порача на дипломатите кои допрва ќе доаѓаат, да внимаваат на својот углед кога се фотографираат и ја поддржуваат Владата на ДУИ и СДСМ, бидејќи се сликаат, како што рече, со криминалци.

– Од тоа што го разговаравме со министерката за надворешни работи на Германија, јас ги кажав нашите аргументи, не е пристојно да кажам што тие говореа, но не слушнав доволен број аргументи со кои би ме убедиле да го променам својот став и затоа заклучокот беше дека овој Парламент нема мандат за уставни измени, дека под бугарски диктат ВМРО-ДПМНЕ нема да прифати уставни измени и дека имаме план кој е составен од три дела којшто содржи национални, политички и економски план. Подготвени сме тој план веднаш по изборите да го ставиме на располагање пред дипломатите на ЕУ – рече Мицкоски.

Тој повтори дека излез од проблемот се брзи предвремени парламентарни избори на кои партиите ќе излезат со план за надминување на проблемот.

– ВМРО-ДПМНЕ се однесува сериозно и нуди план за излез од кризата, а прв чекор се предвремени парламентарни избори. Порачувам на сите коишто доаѓаат, луѓето кои го водат процесот денеска. Владата на ДУИ и СДСМ се некредибилни и не уживаат авторитет кај граѓаните. Секој од нив треба да е свесен дека кога ќе застане до тие луѓе самиот си прави проблем, бидејќи набрзо од денеска ќе мора да се соочи со фактот дека стоел, се сликал и позирал со луѓе коишто длабоко биле вовлечени во криминал и корупција и тоа не знам како ќе биде во нивните матични држави прифатено. Затоа апелирам да не ја спасуваат политичката кариера на политичките криминалци од Владата на ДУИ поддржана од СДСМ, да се завртат кон народот и да прашаат народот што очекува, а народот очекува час поскоро нова влада којашто ќе биде поддржана од народот – рече Мицкоски.

Тој вели дека очекува притисоците од дипломатите да се засилат бидејќи, според него, тоа го бараат од нашата Владата.

– Притисоците ќе продолжат оти овие од Владата бараат да се прават притисоци. Нема проблем, јас немам проблем да ги издржам притисоците. Дали се жестоки, да жестоки се и ќе продолжат, но разликата од Преспа е дека сега ВМРО-ДПМНЕ е консолидирано, обединето и нема слаба алка, сега не се други центри на влијание. Единствени сме, не затоа што водиме инает, туку веруваме дека ова што го правиме е историја. Јас лично ни милиметар нема да се поместам и ќе ги истрпам сите притисоци кои верувајте не се пријатни. Но после ова или ќе нѐ биде или нема да не биде, јас верувам дека ќе нѐ биде – рече Мицкоски.

Тој на прашањето на премиерот Димитар Ковачевски кој е ставот на ВМРО-ДПМНЕ за уставните измени, дали тој на Мицкоски или на поранешниот лидер Никола Груевски рече дека неговиот став е јасен и го прозва премиерот да одговори кој е ставот на Груевски.

– Мојот став е јасен, кажан во јавноста, повторен и непроменлив итн. А, што се однесува за ставот на поранешниот претседател на ВМРО-ДПМНЕ, Никола Груевски, можеби Ковачевски може повеќе да ви каже. Ако ги знае деталите нека ги сподели со јавноста. Добро е да го прашате, еве на следната средба со него да го прашате кој е ставот којшто тој го знае, а јавноста не го знае, ниту пак јас, ниту претпоставувам граѓаните – Мицкоски.