НЕМА ДА ИМА ПЕНЗИЈА ПОД ПРАГОТ НА СИРОМАШТИЈАТА Министерката Тренчевска најавува нова методолигија за утврдување на минималната пензија
Минималната пензија треба да се врзе со прагот на сиромаштија и да нема пензија под прагот на сиромаштија. Се чекаат проекциите од Светска Банка во поглед на прагот на сиромаштија, што би било основа за креирање на одредби со кои ќе се регулира минималната пензија, рече министерката за труд и социјална политика.
Најдобар начин за редовно покачување на пензиите е дефинирањето на минималната пензија поврзано со прагот на сиромаштија и да нема пензија под прагот на сиромаштија – изјави министерката за труд и социјална политика, Јованка Тренчевска во гостувањето на утринската програма на КТВ – Кавадарци.
Таа истакна дека досега се реализирани средби со Сојузот на пензионери, со здруженијата низ градовите во државата, со претставници на иницијативните одбори на пензионерите кои протестираат и Партијата на пензионери.
Министерката информираше и дека е формирана и работна група, каде има претставници од министерствата за труд и социјална политика и финансии, од кабинетот на вицепремиерот за економски прашања, од Фондот за пензиско и инвалидско осигурување, Сојузот на пензионери, МАПАС и приватните пензиски друштва. Првиот состанок е закажан на 6. септември.
– Целта на работната група е да се разгледаат сите барања од пензионери во државата кои се пристигнати во министерството и по истите да се дискутира. Сè она што ќе произлезе од дискусијата, од работата на работната група, во однос на мерки со кои што ќе се подобри животниот стандард на пензионерите, во делот на барањата за линеарно зголемување на пензиите, за минималната пензија и подготовка на закони или измени на закон за пензиско и инвалидско осигурување, ќе биде разгледано сè со цел да дојдеме до најдоброто решение за минимална пензија по примерот на државите од регионот – рече Тренчевска.
Министерката истакна дека најдобар пример е дефинирањето на минималната пензија да се врзе со прагот на сиромаштија и да нема пензија под прагот на сиромаштија. Таа додаде дека се чекаат анализите од Светска Банка, во делот на проекциите за прагот на сиромаштија наназад неколку години и проекцијата за движењето во следните години. Тоа би било основа за креирање на одредби со кои ќе се регулира минималната пензија.
Тренчевска најави и социјални мерки кои ќе ги преземе Владата за зимскиот период. Со оглед на тоа дека најранлива категорија се оние со најниски пензии, ќе се креираат сет на мерки кои во фокус ќе ги имаат овие граѓани, рече Тренчевска.
Таа посочи и дека со Фондот за здравство и со Министерство за здравство се разговара за проширување на позитивната листа на лекови, како и за партиципацијата на болничкото лекување, за да се намалат трошоците на пензионерите.