ЦЕЛА ШУТКА ВО ПЕТОК ЌЕ ДОЈДЕ КАЈ ДАНЕЛА Граѓаните на протест ќе бараат редовен јавен превоз
Градоначалникот Дудуш изрази надеж дека протестот ќе поттикне реакција од надлежните институции и ќе се преземат мерки за подобрување на јавниот превоз во главниот град.
Градоначалникот на општина Шуто Оризари, Курто Дудуш, за во петок (22 ноември) најави протест пред зградата на Град Скопје од 13.30 часот. Причина за протестот е влошената состојба со јавниот превоз, кој предизвикува огромни проблеми на граѓаните.
– Секојдневно се соочуваме со истиот проблем – луѓето чекаат со часови на автобуските станици. Не можеме да дозволиме нашите деца, жени и старци да трпат на овие минусни температури, по два до три часа чекајќи автобус, кој можеби ќе дојде, а можеби и не – изјави Дудуш во видео обраќање на неговиот профил на Фејсбук.
Тој додаде дека протестот ќе биде мирен и ги повика сите граѓани, без разлика на етничката припадност, да се приклучат, бидејќи проблемот со јавниот превоз го засега целиот град.
– Ова не е проблем само на Шуто Оризари. Ова е проблем кој ги засега сите граѓани на Скопје – потенцираше Дудуш.
Градоначалникот изрази надеж дека протестот ќе поттикне реакција од надлежните институции и ќе се преземат мерки за подобрување на јавниот превоз во главниот град.
Жителите на Шуто Оризари се соочуваат со огромни предизвици поради недостигот од јавен превоз, особено во последниве студени недели. Неможноста да се стигне навреме на работа, на училиште или на лекар ги принудува граѓаните да бараат алтернативни решенија, како делење трошоци за такси, што значително го оптоварува нивниот буџет.
Жителка на Шуто Оризари за Плусинфо раскажува како секојдневно се организираат за да стигнат до центарот на Скопје и назад.
– Автобуси речиси и да нема. Нас работата нѐ чека, мораме да однесеме парче леб дома, па затоа секое утро се договараме три-четири жени и делиме такси за да стигнеме до зградата на Пошта во центарот на Скопје. Од таму, секоја си продолжува со автобус на својата работа. Истото го правиме и за враќање. Кога ќе видиш нас ни испаѓа дека плаќаме многу повеќе отколку што би требало за јавен превоз, а и времето што го трошиме е незамисливо – вели таа.
Незадоволството на скопјани со јавниот превоз во главниот град секојдневно се зголемува. Жителите речиси на сите скопски општини кои користат јавен превоз мрзнат на автобуските постројки. Објавата на градоначалникот Дудуш почна да се шири на социјалните мрежи, па може да се очекува овој протест да добие масовност, бидејќи трпението на скопјани е надминато.
За време на викендот, но и вчера, ситуацијата со јавниот превоз во Скопје повторно беше проблематична. Од Независниот синдикат на претпријатието велат дека немањето нафта е причина за колапсот на градскиот превоз. Оттаму додаваат дека повеќе од три месеци ЈСП се соочува со недостиг на нафта, но ситуацијата ескалирала викендов кога воопшто не била испорачана нафта во двете автобази. Од синдикатот не знаат што се случува, но велат дека ова е голем срам за Градот.