Некој ги искршил бравите и си го присвоил планинарскиот дом „Даре Џамбаз“ на Водно, планинарите бесни

Некој вчера извршил упад во планинарскиот дом „Даре Џамбаз“ на врвот на планината Водно и насилно влегле во објектот, кршејќи ги бравите на влезната врата, реагираат планинари на социјалните мрежи и посочуваат дека целта на ваквиот упад е да се преземе планинарскиот дом кој шест децении беше отворен за сите негови посетители.

Со овој чин, реагираат планинарите, се затвора последниот јавен објект за одмор и за рекреација на граѓаните на планината Водно, а како што додаваат, новите сопственици наводно се добро познати угостители од Скопје.

„Отсега, значи, доколку не одлучи поинаку надлежниот Суд, скопјани и сите други посетители на Водно, во иднина ќе немаат ниту едно засолниште со покрив каде што ќе можат да се преслекуваат, да се стоплат и да закрепнат, да си каснат сендвич од ранец, да си поседат, без да се присилени да плаќаат кафански цени за тоа задоволство, бидејќи условите на идните газди на домот на Крстовар бил – тоа да биде забрането во идниот објект. Неименуваниот угостител ветил дека ќе инвестира во оплеменување на Домот и дека ќе вложи дури 45.000 евра, ама само под услов ако се макнат оние со сендвичите и туршиите и маиците што се сушат покрај печката. Ете толку ќе чини операцијата во која мое и твое ќе стане нивно“, реагираат планинари на социјалните мрежи.