НЕКА ГИ ПОДНЕСЕ УСТАВНИТЕ ИЗМЕНИ ПА ДА ВИДИМЕ ДАЛИ ЌЕ МУ ПОМИНАТ ВО СОБРАНИЕ Мицкоски му порача на Ковачевски да престане да биде кукавица

Ковачевски да престане да биде кукавица и да ги прати уставните измени во Собрание да види дали ќе му поминат, порача лидерот на ВМРО-ДПМНЕ, Христијан Мицкоски, на денешното отворање на штаб на Градскиот комитет на партијата на улицата Македонија во центарот на Скопје.

– Јас сум кажал дека работната група е затворена тема за мене и за ВМРО-ДПМНЕ, но ако еве веќе толку му е мерак со тие уставни измени го повикувам час поскоро да ги достави до парламентот и да ја затвориме таа тема, да не ја оптеретуваме јавноста со тоа дали ќе има уставни измени или ќе нема уставни измени еве ако е толку сигурен дека тоа што го прави тој и владата на ДУИ поддржана од него и неговата партија СДСМ, еве нека ги достави до парламентот и како такви ние ќе видиме дали практично ќе имаат мнозинство за потребата за отворање на Уставот или ќе немаат и да ја затвориме темата, да не ја оптеретуваме јавноста бидејќи навистина имаме многу суштински теми за кои што треба да зборуваме. А, тоа се криминалот, корупцијата, лошата економска состојба, проблемите со кои се соочуваат граѓаните во Македонија. Еве ако му е толку мерак не се однесува како повторувач во трето одделение нека ја достави иницијативата. Не знам зошто чекаат, нели требаше минатата година во септември, октомври, па се предомислија во декември, па потоа рекоа во февруари, па не во февруари во мај, еве нека седнат и нека достават да ја затвориме еднаш засекогаш таа работа. Во овој парламентарен состав уставни измени ќе нема и тоа му е јасно и на Ковачевски и сега мисли дека ќе нè кодоши по Европа по светот ќе лелека ќе плаче мислејќи дека ќе дојде некој овдека и ќе нè убедува ќе не притиска. Треба и на него да му е јасно дека во политиката во вакви моменти се препознаваат луѓето кои што имаат амбиција да се занимаваат со политика. Ова се моменти кога човек треба да одбере, и ова се моменти кога ние како ВМРО-ДПМНЕ јасно одбравме а тоа е народот, страната на народот и тука нема дилема. Затоа еве го повикувам да не биде кукавица ако му е толку мерак, бега од избори, го поставија таму без да излезе на избори, нека ја достави оваа иницијатива во парламентот, нека не чека нема да се смени ништо, ни во мај ни во јуни ниту во септември ниту во октомври да се смени еве јас јавно го кажувам тоа. Нека ги достави во Парламентот ако има 80 пратеници како рековме јас заминувам од политиката тој продолжува да биде премиер ако нема 80 пратеници тогаш треба да одиме на избори, затоа што неговата политика е поразена – нагласи Мицкоски.

Лидерот на ВМРО-ДПМНЕ порача дека Градскиот комитет на ВМРО-ДПМНЕ во Скопје „ќе биде место кое што ќе можат скопјани да доаѓаат и да разговараат за сето она кое што ценат дека можеме ние како ВМРО-ДПМНЕ да го испорачаме и ние како ВМРО-ДПМНЕ да го реализираме“.

На прашањето дали ВМРО-ДПМНЕ во вакви услови е подготвено да прифати менување на државниот грб за да се заврши процесот на менување на уставните измени, Мицкоски рече дека тоа се два процеса и не се поклопуваат еден со друг и дека, како што кажа, бидејќи порано е постигнат консензус за менување на државниот грб, тоа може веднаш да се почне во рамките на парламентот.

Мицкоски ги повика сите лидери веднаш да преземат иницијатива за тоа и рече дека новиот грб е добар момент за обезбедување единство во земјава, но повтори дека двата процеса немаат никаква врска меѓу себе.