НЕ УПРАВУВАЈТЕ СО ВОЗИЛО ПОД ДЕЈСТВО НА АЛКОХОЛ Републичкиот совет за безбедност на сообраќајот на патиштата со апел до возачите

Со цел поголема безбедност во сообраќајот Републичкиот совет за безбедност на сообраќајот на патиштата, во пресрет на празниците реализира кампања под мотото „Вози одговорно за среќна и безбедна година!“

„Не управувај со моторно возило доколку си под дејство на алкохол!“, е една од главните пораки до возачите во пресрет на празниците.

Кампањата се реализира со цел укажување на штетното дејство на алкохолот врз способноста за управување со моторно возило и подигнување на свеста кај возачите за одговорно учество во сообраќајот, велат од РСБСП.

„Алкохолот е една од водечките причини за предизвикување на сообраќајни незгоди со фатални последици, кои може да ги засегнат не само возачите, туку и сопатниците и пешаците. Возењето под дејство на алкохол, дури и при ниски нивоа на алкохол во крвта, предизвикува проблеми со концентрацијата на возачите, ја намалува координацијата на мускулите и ја нарушува способноста за расудување и идентификација на ризиците во околината на патот“, стои во соопштението на РСБСП.

Тие порачуваат дека „токму затоа со оваа кампања се укажува на значењето на одговорното возење, почитувањето на сообраќајните правила и прописи, внимателноста и грижата за сите учесници во сообраќајот. Се препорачува возачите да користат такси превоз доколку одлучат да користат алкохол, или, пак, нивното возило да го управува сопатник/пријател кој не пиел, како и одземање на клучевите од возилото на вашиот пријател кој користел алкохол со цел спречување да вози пијан и осигурување на неговата безбедност“.

РСБСП апелира до возачите:

„Не управувај со моторно возило доколку си под дејство на алкохол! Грижи се за својата и за безбедноста на сите учесници во сообраќајот. Вози одговорно и патувај безбедно“.

Дел од препораките се и да се направи зимска проверка на возилото.

„Неповолните временски услови на патиштата (влажни коловози, пониски температури, врнежи на дожд и снег, намалена видливост) може да го зголемат времето на реакција на возачите, да ги деконцентрираат, да го продолжат сопирачкиот пат на возилото и сл. Затоа РСБСП советува да се провери возилото и да се подготви за зимските услови, да се почитува законската обврска за носење на зимска опрема и да се придонесе за побезбедно учество во сообраќајот на патиштата“, порачуваат од Републичкиот совет за безбедност на патиштата.