НЕ СУМ ЧУЛА НЕКОЈ ДА БОЈКОТИРА УСТАВЕН СУД Судиите Кадриу и Ајдари се таму за да решаваат, можат да гласаат „за“ или „против“
Она што најшокантно ми зазвуче вчера е дека не може да се признаваат одлуки на еднонационален суд, рече претседателката Гордана Сиљановска Давкова.
Претседателката Гордана Сиљановска Давкова вели дека е очекувана одлуката на Уставниот суд за подготвителна седница пред да донесе одлука по иницијативите за Законот за употребата на јазиците.
– Многу пати сум велела дека во Уставниот суд треба да има повеќе јавни расправи. Едно време беа речиси суспендирани. Тоа е онаа фаза кога ќе се поканат претставници на иницијаторите, претставници на институциите, но и претставници на оние кои не се согласуваат со иницијативите – рече претседателката.
Во врска со потезите на уставните судии Осман Кадриу и Насер Ајдари, кои ја бојкотираа вчерашната седница на Уставниот суд, претседателката рече дека не ги разбира.
– Не сум чула некој да бојкотира работа на суд или на уставен суд. Тие се таму за да решаваат. Можат да гласаат „за“, можат да гласаат „против“. Она што најшокантно ми зазвуче вчера е дека не може да се признаваат одлуки на еднонационален суд – рече претседателката Сиљановска Давкова.