НЕ СТЕ ФАКТОРИ ЗА ОДЛУЧУВАЊЕ Мицкоски удри по Пендаровски и по Ковачевски – претседателот се однесува како аналитичар, премиерот прави што ќе му каже Ахмети

Стево Пендаровски изминатиов период се однесува како аналитичар без да презема конкретни чекори, обвини денеска лидерот на опозициската ВМРО-ДПМНЕ, Христијан Мицкоски, по годишното обраќање на шефот на државата во Парламентот.

– Често ќе го видите во јавност како ќе се залета па кога ќе добие по чело ќе ретерира 2-3 чекори назад, затоа што не му е важно дали ќе биде допадлив за народот, туку дали ќе биде допадлив за владата на ДУИ и СДСМ од која очекува поддршка за следен мандат – изјави Мицкоски при посетата на општина Аеродром, одговарајќи на новинарско прашање за работата на Пендаровски и неговото обраќање во Собрание.

Мицкоски истакна дека никаде нема да видите како Пендаровски прави нешто за да се гарантира безбедноста во Македонија.

– Државата тоне во инфлација, криминал и корупција, здравството е катастрофа, учениците немаат учебници, дојави на бомби секој ден, а тој се иззема од одговорност иако има цела агенција за разузнавање под негова ингеренција. Не сум слушнал никаков коментар, освен што ја следат опозицијата и мене лично дали воопшто прават нешто за да ја обезбедат безбедноста на граѓаните и Македонија, неговите кадри поставени во агенцијата за разузнавање – потенцира Мицкоски.

Мицкоски нагласи дека Стево Пендаровски е срам за функцијата која ја врши и тој е ништо повеќе од партиски полтрон на позицијата претседател на Македонија.

Одговарајќи на новинарско прашање во однос на тоа дали ќе има предвремени избори додека премиерот вели дека нема да има реконструкција на влада и парламентарните избори се во 2024 година, Мицкоски истакна дека Димитар Ковачевски не е човекот кој одлучува, туку дека во власта фактор се ДУИ, Али Ахмети и парите од тендерите што се делат.

– Час поскоро, час поскоро треба да се случат предвремени парламентарни избори првиот возможен термин треба да се случат тие предвремени парламентарни избори ако ме прашувате за конкретни дати сега не би зборувал за конкретни дати но мислам дека оваа пролет е одличен период кога би можеле да се случат тие предвремени парламентарни избори затоа што колку подолго остане оваа влада на ДУИ и СДСМ толку повеќе ќе губи Македонија и толку помалку ќе нѐ има во Македонија, а сите буквално сите сакаат да направат штета на Македонија и на македонскиот народ сите, сите буквално партии во Македонија се организирани најпрвен преку ВМРО-ДПМНЕ да направат штета врз македонскиот народ а потоа и врз Македонија. Затоа мора час поскоро да се случат тие предвремени парламентарни избори за да престане Македонија да губи и да престане егзодусот на Македонците од Македонија – нагласи Мицкоски.

Во однос на тоа дали е возможно напролет да има предвремени парламентарни избори бидејќи Ковачевски вели дека редовни би биле изборите, Мицкоски истакна дека Ковачевски не е човекот кој што одлучува.

– Го слушав вчера Ковачевски, Ковачевски не е човекот кој што одлучува, таму одлучуваат два фактори, таму одлучува ДУИ и ДУИ е свесен и Али Ахмети дека тој никогаш нема да биде во подобра позиција од оваа сега, најсреќен во оваа позиција е ДУИ и Али Ахмети. И вториот фактор се парите што се делат од тендерите во четири очи, таму нема стратегија, нема политичка мудрост нема визија, таму фактор е ДУИ и парите што се делат, но за среќа работиме на тоа да ги дефакторизираме овие два фактори, едниот е ДУИ и Али Ахмети а другиот е парите што се крадат, затоа што новата влада на ВМРО-ДПМНЕ има сериозна намера да се зафати со пресметка на криминалците во политиката, а тие во оваа влада ги има многу – истакна Мицкоски.