СКОКНАА ЦЕНИТЕ ЗА ИЗНЕЈМУВАЊЕ ТАНКЕРИ ЗА НАФТА Профитот на сопствениците на танкери двојно се зголеми

Геополитичките тензии, прекините во снабдувањето со нафта и справувањето со „сивата флота“ доведоа до нагло зголемување на цените за изнајмување на танкери, цената на танкерите  и експлозија на профитот во  индустријата.

Отстранувањето од власт на венецуелскиот претседател Николас Мадуро  го отвори извозот на нафта од земјата и им овозможи на повеќе западни компании за танкери да продолжат да работат таму по многу повисоки цени од порано.

Цените на спот чартер на пример за бродовите на грчката компанија „Цакос Енерџи Навигација“ во Венецуела тогаш скокнаа на 110.000 долари дневно до крајот на јануари, во споредба со 70.000 долари пред тоа. Толку, би платила нафтена компанија или трговец со нафта на компанија за танкери за изнајмување на еден брод дневно со моментално вчитување.

По нападот врз Иран, цената за изнајмување на некои бродови се искачи на 160.000 долари дневно.

Цените за изнајмување на танкерите за нафта дополнително поттикнати од прекините во поморските патишта и во Црвеното Море, каде што проиранската милиција Хути нападна западни бродови, а сега и во Ормутскиот теснец, каде што Техеран практично го блокира клучниот воден пат низ кој минуваат околу 20% од светските залихи на нафта секој ден.

Тоа, исто така, доведе до силен пораст на акциите на компаниите за танкери. Акциите на грачката компанија за танкери за нафта „Цакос Енерџи Навигација“ пораснаа за 69% од почетокот на годината. Акциите на „Фронтлајн“, петтата најголема компанија за танкери за нафта во светот во која милијардерот Џон Фредриксен има значаен удел, пораснаа уште повеќе, дури 93%  во последните 60 дена.

Американската кампања против таканаречената „сива“ или „сенка“ флота, група од повеќе од 1.000 стари танкери регистрирани во нејасни јурисдикции кои пловат без западно осигурување и ја кријат својата локација или префрлаат нафта од брод на брод, им дава дополнителен поттик на компаниите за танкери.

Таква флота долго време ја користеа Иран и Венецуела за извоз на нафта со цел да ги заобиколат западните санкции, а по инвазијата на Украина во 2022 година, и Русија почна да ја користи.

Од декември минатата година, САД запленија 10 танкери од таа флота кои транспортираа нафта од Иран, Русија и Венецуела, и воведоа санкции за уште околу 300 од нив. Таа конфронтација, заедно со соборувањето на Мадуро и војната во Иран, отвори нови можности за компаниите за танкери.

Сето тоа доведе и до раст на цената на танкерите. На пример, побарувачката за големи танкери познати како VLCC, кои можат да пловат на долги растојанија, почна силно да расте веќе во декември.

Голем дел од ова беше поттикнато од корејската компанија Синокор, која за околу три месеци потроши повеќе од 2,5 милијарди долари за купување танкери VLCC за да создаде една од најголемите флоти во светот, но и од случувањата потоа.

Неодамна, цената на тие користени танкери VLCC достигна нивоа невидени во изминатата деценија, при што бродови стари 10 години се продаваат за повеќе од 100 милиони долари по парче, според податоците од Wesson Nautical и фирмата за поморска аналитика Signal Group.

Сите овие фактори го зголемија богатството на 13-те најбогати сопственици на танкери што ги следи Форбс за повеќе од 50% во последната година, на вкупно околу 130 милијарди долари, главно поради порастот на цените на акциите и вредноста на бродовите.