НЕ СЕ ОДРЖА СЕДНИЦА НА КОМИСИЈАТА ЗА НАДЗОР НАД РАЗУЗНУВАЧКИТЕ АГЕНЦИИ Пратениците ја презакажале за да се сочува интегритетот на Собранието

Комисијата за надзор над работата на Агенцијата за национална безбедност и на Агенцијата за разузнавање, која првично беше закажана за 5 септември 2025 година со почеток од 17 часот, по договор на пратеничките групи преку координативен состанок ќе се одржи во среда, 10 септември 2025 година, соопшти Кабинетот на претседателот на Собранието, Африм Гаши.

Истовремено, за истиот ден е предвидена и надзорна посета во просториите на Агенцијата за национална безбедност, се додава во соопштението.

„Оваа одлука е во насока на зачувување на дигнитетот и интегритетот на Собранието и како резултат на политичката култура и отворената дебата меѓу сите претставници во Собранието. Таа ја потврдува посветеноста на транспарентност, одговорност и унапредување на демократските процеси во интерес на граѓаните“, соопшти
Кабинет на претседателот на Собранието.

Гаши ја закажа седницата за денеска, откако претходно претседателот на Комисијата, Скендер Реџепи одби да го стори тоа, со образложение дека самиот не би можел да присуствува затоа што уште не е одгоорено на неговото барање да му се издаде безбедносен сертификат. Со седницата треба да претседава пратеничката Славјанка Петровска од СДСМ.