НЕ САМО ВМРОВЦИ, ТУКУ И ЕСДЕEСОВЦИ НЕМА ДА ВИ ГЛАСААТ! Опозицијата му порача на Груби да работи за уставните измени во својот двор

Артан Груби не треба да работи на ВМРО-ДПМНЕ, туку да поработи на тоа дали сите пратеници од неговата втора партија СДС се спремни да гласаат за уставни измени – реплицираше денеска Марија Митева, портпарол на ВМРО-ДПМНЕ, на изјавата на Груби дека имаат план како да ја придобијат опозицијата да гласа за уставните измени, без притоа да се користат уцени, дадена во гостување на Телма.

– Груби рече дека работел на тоа цело време да се гласало за уставните измени. Порачуваме да не се мачи, од ВМРО-ДПМНЕ. Груби да поработи на тоа дали сите пратеници од неговата втора партија СДС се спремни да гласаат за уставни измени. И еве поставуваме отворени прашања, дали тројца пратеници од првата и втората изборна единица кажале дека, ако е на маса ова, тие нема да гласаат? Дали пак шестмина пратеници од внатрешноста, на СДС им рекле дека уставните измени, цитирам: се најлошото нешто што може оваа влада да го направи? Дали еден пратеник од ДУИ побарал пари за да гласа? Груби не треба да работи на ВМРО-ДПМНЕ, Груби треба да си поработи во својот двор – рече Митева.

– Работиме не само да се обезбедат 8 пратеници, туку ние работиме цело ВМРО-ДПМНЕ да гласа за уставните измени – рече Груби синоќа во емисијата „Топ-тема“ на телевизија Телма.

Во врска со изјавите од страна на лидерот на ВМРО-ДПМНЕ Христијан Мицковски, дека ниту еден пратеник од оваа партија нема да гласа, Груби рече тој не е пратеник.

– Сите знаеме каква беше лојалноста во минатиот парламентарен состав – додаде Груби, алудирајќи на усвојувањето на Преспанскиот договор со помош на гласови на пратеници од ВМРО-ДПМНЕ.

Во дебатата за тоа дали и како ќе се усвојат уставните измени вчера со соопштение се вклучи и СДСМ.

„Нашиот план е соочување односно прикажување на аргументи, факти дека ова е важно и добро да го направиме за да го продолжиме европскиот пат на државата. Нашиот план е да разговараме со сите политички партии. Верувам дека од она што веќе го слушаме голем број од политичките партии, голем број од пратениците она што го говорат по ходниците е дека ќе се одважат и ќе гласаат за уставните измени“ – се вели во соопштението на СДСМ.