НЕ МОЖАМ ДА ВЕ СЛУШНАМ, МАЛКУ СУМ ЗАФАТЕН! Откако ги блокираше на Инстаграм, Бруклин Бекам му испрати прикриена порака на своето отуѓено семејство

 

Бруклин Бекам или како што пишува Дејли Мејл, „26-годишниот амбициозен готвач“, ги зачуди сите со видеото споделено само неколку дена откако неговиот брат Круз го прекина молчењето и напиша дека Бруклин го блокирал на Инстаграм целото семејство.

Во клипот објавен на неговиот Тик-Ток профил на Cloud23, Бруклин се шета низ град додека во позадина свири песната „Телефон“ на Лејди Гага.

Тој издвоил дел од текстот и ја болдирал реченицата: „извини, не можам да те слушнам, малку сум зафатен“.

Потоа продолжува да го промовира својот лут сос, оставајќи ги обожавателите да шпекулираат за тајмингот и за пораката на објавата.

Ова доаѓа откако Дејвид и Викторија инсистираа дека никогаш нема да престанат да го следат својот сакан син Бруклин на Инстаграм, велат извори блиски до двојката.

Всушност, тие веруваат дека тој ги блокирал во потег што се чини дека е знак на „целосно отуѓување“ од неговото семејство.

Пријателите на двојката велат дека е незамисливо тие да донесат одлука да не го следат него.

– Дејвид и Викторија никогаш нема да престанат да го сакаат Бруклин. Тие секогаш ќе бидат тука за него и секогаш сакаат тој да го знае тоа, тие се скршени поради оваа расправија – вели извор близок до двојката.

Според изворот, за Дејвид и Викторија Инстаграм бил нивната последна врска со Бруклин, бидејќи тој јасно ставил до знаење дека повеќе не сака да разговара со нив и тие не разговарале со месеци.

– Следејќи го, тоа беше порака до него дека сè уште го сакаат и сè уште сакаат да го следат неговиот живот. Сега не можат да го прават тоа, но тоа не е нивно дело – рекол истиот извор.

Блокирањето на Инстаграм дојде само неколку дена пред Божиќ.

Бруклин не им се придружи на своите родители и помладите браќа Ромео и Круз и на сестрата Харпер за празниците.

Помладиот брат на Бруклин, Круз, (20), ги негираше извештаите дека неговите родители престанале да го следат нивниот син во објава на Инстаграм, тврдејќи дека тој, Дејвид и Викторија биле „блокирани“ од страна на Бруклин.

– Моите мајка и татко никогаш не би престанале да го следат својот син… Ајде да ги утврдиме фактите. Тие се разбудија блокирани… како и јас – напиша Круз.

Дејли мејл контактирал со претставници на Бруклин за коментар за тврдењата на Круз.

Ова е најјавниот знак досега дека нема комуникација меѓу нив поради нивната семејна расправија.

Сопругата на Бруклин, Никола, (30), исто така не ги следи Дејвид и Викторија, ниту пак тие ја следат неа.