НЕ Е ПОВЕЌЕ ПРЕТСЕДАТЕЛКА НА ЗЕЛС Градоначалниците на ВМРО-ДПМНЕ и на СДСМ со здружени сили ја разрешија Данела Арсовска

Скопската градоначалничка Данела Арсовска повеќе не е претседателка на Заедницата на единиците на лолкална самоуправа на Република Македонија (ЗЕЛС), бидејќи градоначалниците на СДСМ и на ВМРО-ДПНЕ денеска гласаа за нејзино разрешување.

На оваа одлука бурно реагираше Арсовска, која преку соопштение ги обвини СДСМ и ВМРО-ДПМНЕ дека се во коалиција против неа.

„Уште еднаш на дело се покажа коалицијата помеѓу СДСМ и ВМРО-ДПМНЕ при денешното гласање во Заедница на единиците на локална самоуправа на Република Македонија. Со здружени гласови на градоначалниците на СДСМ и ВМРО-ДПМНЕ, претставници во ЗЕЛС, беше разрешена од позицијата претседател на ЗЕЛС, градоначалничката на Град Скопје, Данела Арсовска. Ова е само последниот пример за соработката помеѓу две партии на штета на граѓаните за нивните лични и теснопартиски интереси. На постојниот политички естаблишмент очигледно му пречат луѓе со визија, вредни и чесни, луѓе кои се независни и делуваат исклучително во интерес на граѓаните. На СДСМ и на ВМРО-ДПМНЕ очигледно им пречат луѓе кои знаат да кажат ‘не’ на корупцијата и криминалот, луѓе кои јавниот го ставаат пред бизнис интересот на врхушката во партиите. Истите луѓе кои се најзаслужни за ерозија на македонското општество во сите сфери од денес ја преземаат контролата врз единствената национална асоцијација и непрофитна организација, во која на доброволна основа членуваат сите 80 општини и Градот Скопје“, се вели во соопштението на Град Скопје.