НЕ ЈА ЧУВАЛЕ ШУМАТА, НАПРАВИЛЕ ШТЕТА ОД 171.000 ЕВРА Кривична пријава против шест вработени во ЈП „Национални шуми“
Според таблицата за пресметка на штета, посечени биле вкупно 1.504 кубни метри, при што на претпријатито му била нанесена вкупна штета во износ од 10.528.000 денари или 171.186 евра, соопшти полицијата.
Битолската полиција до Основното јавно обвинителство Битола, поднесе кривична пријава против шестмина вработени во Јавното претпријатие „Национални шуми“.
Поднесени се пријави против И.Т.(30) од Демир Хисар, И.Р.(59) од с. Кутретино, демирхисарско, Б.Ј.(60) од с.Слоештица, демирхисарско и против С.У.(50) од Демир Хисар поради постоење основи на сомнение за сторено кривично дело Несовесно работење во службата, а против А.Ш.(31) од с. Смилево, демирхисарско и М.Ѓ.(46) од с. Загорче, демирхисарско, се поднеснеи пријави за Злоупотреба на службената положба и овластување.
„Првопријавениот И.Т., вработен во ЈП „Национални Шуми“ како раководител на Подружница „Бигла“ – Демир Хисар, во текот на 2023 и 2024 година несовесно постапил во вршењето на своите овластувања и должности. Посредно преку својата шумо-чуварска служба не извршил теренска контрола во атарот на селото Прибилци каде што бил утврден кусок од 343 кубни метри дрвна маса, која била посечена, но не и евидентирана во сметководствената евиденција на подружницата. На тој начин нанел штета на јавното претпријатие во износ од 2.401.000 денари или 39.040 евра“, соопшти полицијата.
Исто така, се додава, со неизвршување на теренска контрола во реонот на шумско стопанската единица ,,Илинска планина“, бил утврден кусок од 954 кубни метри дрвна маса, која била посечена, но не евидентирана во сметководствената евиденција на подружницата и на ЈП „Национални шуми“, првопријавениот нанел штета во износ од 6.678.000 денари или 108.585 евра.
„Во шумско стопанска единица ,,Пречиста“ бил евидентиран кусок на дрвни сортименти во количина од 83 кубни метри со што првопријавениот на претпријатието му нанел штета во износ од 583.100 денари или 9.481 евра. Додека, во Шумско стопанска единица ,,Јаворец“ бил евидентиран кусок на дрвни сортимани во количина од 123,8 кубни метри со што првопријавениот на јавното претпријатие му нанел штета во износ од 866.600 денари или 14.091 евра. Според таблицата за пресметка на штета, посечени биле вкупно 1.504 кубни метри, при што на претпријатито му била нанесена вкупна штета во износ од 10.528.000 денари или 171.186 евра“, се вели во соопштението од полицијата.
Второпријавениот И.Р., се додава, во текот на 2023 и 2024 година, како раководител на шумо-чуварска служба во Подружница „Бигла“, заедно со третопријавениот и четвртопријавениот, шумо-чувари во подружницата, не извршиле теренски надзор, односно не ја извршувале примарната задача да ја чуваат шумата во државна сопственост. На тој начин дозволиле на локациите да биде посечена дрвната маса и на претпријатието да му биде нанесена штетата.
„Петтопријавениот А.Ш., референт за превоз во подружницата, во текот на 2023 година се задолжил со приемница за сеча и приемница за дотур на 185,5 кубни метри огревно дрво, а по извршената испорака, во 2024 година од страна на пописната комисија бил констатиран кусок од 83 кубни метри и на тој начин била нанесена штета на јавното претпријатие. Шестопријавениот М.Ѓ., референт за сеча и дотур, во текот на 2023 година се задолжил со приемница за сеча и приемница за дотур на вкупно 604 кубни метри огревно дрво, а по извршената испорака во 2024 година од пописната комисија бил констатиран кусок од 155 кубни метри огревно дрво“, соопшти полицијата.