НАТОВАРИЛЕ ПОЛОВИНА ТОН МАРИХУАНА И МУ ЈА ДУВНАЛЕ! Грабеж во фабрика за медицински канабис во Чегране
Со закана со пиштол го затвориле чуварот во една просторија и од фабриката одзеле 41 вреќа со марихуана со вкупна тежина од 552,85 килограми марихуана, известува МВР.
Три лица физички нападнале вработен во обезбедувањето во фабрика за марихуана за медицински цели во атарот на гостиварското село Чегране по што со закана со пиштол го затвориле во една просторија и од фабриката одзеле 41 вреќа со марихуана со вкупна тежина од 552,85 килограми марихуана.
Како што информира денеска МВР, кражбата била пријавена вчера во 23 часот во Одделението за внатрешни работи во Гостивар.
– Според пријавеното, откако си заминале, тој излегол и забележал дека капијата од фабриката била отворена и дека две врати од внатрешниот дел биле искршени. Во консултација и координација со јавен обвинител, увид извршила екипа од Одделението за внатрешни работи Гостивар и било утврдено дека од внатрешноста на објектот лицата одзеле 41 вреќа со вкупно 552,85 килограми марихуана, соопшти МВР.
Претходно, на 4 октомври годинава од страна на ОКП, по извршена вонредна контрола и претрес со судска наредба, во координација со Комисијата за оценување исполнетост на условите во однос на просторот, опремата и кадарот за одгледување на канабис за медицински цели при Министерството за здравство биле констатирани неправилности во работењето на фабриката. Oдземените насади канабис биле предадени на Агенцијата за управување со одземен имот, по што била поднесена кривична пријава против правното и одговорното лице согласно Законот за контрола на опојни дроги и покрената постапка за одземање на лиценцата.