НАСКОРО НОВ ИЗГЛЕД НА ЕВРОТО Европската централна банка распиша оглас за дизајн

Европската централна банка (ЕЦБ) планира да го смени изгледот на евробанкотите. Веќе е објавен и јавен конкурс на кој можат да конкурираат графички дизајнери со живеалиште во Европската Унија. Рокот за доставување дизајни е до 18 август.

Според одлуката на Управниот совет за конечниот дизајн се очекува да биде готов до крајот на 2026 година, по што ќе се анкетираат граѓаните за понудените дизајни.

Новите банкноти ќе бидат подготвени за пуштање во оптек неколку години по оваа одлука и по процесот на производство.

Управниот совет на ЕЦБ веќе избра две можни теми за идните евро банкноти по консултации со експерти и јавноста. Тоа се: „Европска култура“, фокусирана на заеднички културни простори и важни Европејци; и „Реки и птици“, фокусирана на отпорноста и разновидноста на природните екосистеми на Европа. Во јануари Управниот совет, исто така, избра мотиви за да ги илустрира двете можни теми.

Конкурсот ќе се одвива во две фази: фаза на аплицирање и фаза на предлог за дизајн. За време на фазата на аплицирање, дизајнерите мора да ги исполнат специфичните барања наведени во огласот за конкурсот.

Кандидатите ќе бидат оценети врз основа на нивните квалификации и достигнувања.

Избраните дизајнери ќе бидат поканети да учествуваат во втората фаза и да ги достават своите предлози за дизајн. Група независни експерти – Жирито за натпреварот за дизајн – ќе ги оцени предлозите и ќе избере до пет по тема.

-Еврото е повеќе од валута – тоа симболизира европско единство и разновидност. Преку овој натпревар, ги покануваме дизајнерите низ цела Европа да ја обликуваат иднината на нашите банкноти за да го одразат нашиот заеднички културен идентитет и природно наследство – изјави претседателката на ЕЦБ, Кристин Лагард.