НАРОДОТ ПЛАЌА, ВЕНКО СЕ ЛУКСУЗИРА Петрушевски го покажа „аудито Q8“ на Филипче што му го купила фирмата која продавала јаглен на ЕСМ

Бране Петрушевски, пратеник на ВМРО-ДПМНЕ, денеска објави фотографија од „аудито Q8“ на Филипче, за кое тврди дека е купено од фирмата која продавала јаглен на ЕСМ три пати поскапо.

– Народот плаќа за Венко да се луксузира. Да одиме со ред. Венко Филипче лично имал профит од препродажбата на трипати поскапиот јаглен од Грција на ЕСМ од 2022 до 2024 година. Најскап договор за јаглен, кој го склучила ЕСМ, а е по цена од 82.5 евра за еден тон со вкалкулиран ДДВ, е со компанијата „Зобек мининг груп”.

Договорот со „Зобек мининг” бил склучен во септември 2023 година, првично за испорака на 200 илјади тони јаглен за РЕК „Битола” во рок од една година. Со два анекса количината на испорака била зголемена, прво за 40 илјади тони, а потоа за уште 48 илјади тони, со што доаѓа до вкупна цифра од 288 илјади тони – рече Петрушевски.

Тој додаде дека според официјално соопштение од „Лигниторихиа Ахладас”, рудникот во Грција каде се копал јагленот, пратено до грчкото Министерство за енергетика, а до кое дошле истражувачките новинари од Македонија, од овој рудник во 2023 година во Македонија биле продадени 768 827 тони лигнит, по цена помеѓу 28-30 евра по тон.

– Тоа е три пати помалку од тоа што „Зобек мининг“ груп продава. „Зобек мининг груп“ е компанија која води директно до Венко Филипче. Ова е возилото „ауди Q8“ кое Венко Филипче го вози од изборната кампања наваму. Истото е купено на лизинг од компанијата „Зобек мининг груп“ и е дадено на Венко Филипче. Газдата на „Зобек мининг груп“ за новинарите потврдил дека тој го купил аудито на Венко Филипче, преку фирмата која препродавала три пати поскап јаглен на ЕСМ и дека сега возилото е на Филипче – истакна пратеникот од владејачката партија.

Ова е фрапантно и безобразно. Народот плаќа поскапа струја денес за Венко Филипче да вози „ауди Q8“ и  истиот овој Венко Филипче без грам срам води политичка партија и бара гласови, рече Петрушевски.