НАПАЃАЧОТ Е ИЗНЕНАДЕН ШТО РУЖДИ ПРЕЖИВЕАЛ Не ми се допадна тој човек, тој го нападна исламот

Хади Матар, осомничениот напаѓач на Салман Ружди, изјави дека бил изненаден кога дознал дека славниот писател го преживеал нападот, пренесува АП.Во интервју за американски Њујорк пост, од затворот Матар (24) изјави дека „прочитал неколку страници“ од романот на Ружди „Сатански стихови“ и дека идејата за нападот ја добил откако видел објава на Твитер дека писателот ќе биде гостин во Институтот Чаутаука во Њујорк.

– Не ми се допадна тој човек, мислам дека не е добар. Тој е некој што го нападна исламот, ги нападна неговите верувања и религиозниот систем – нагласи Матар и додаде дека гледал видеа од Ружди на Јутјуб, според АП.

Матар, исто така, рече дека го почитува ајатолахот Хомеини, но одби да каже дали нападот бил инспириран од фатвата што поранешниот ирански врховен лидер ја издаде против писателот по објавувањето на „Сатански стихови“. Тој ги отфрли тврдењата дека бил во контакт со иранската Револуционерна гарда.

Во петокот Ружди требаше да одржи предавање за уметничката слобода во Чаутаука, но 24-годишниот Матар го нападна со нож. Состојбата на 75-годишниот писател, роден во Индија, и понатаму е сериозна. Ружди, сепак, е изваден од вентилаторот и може повторно да зборува.

Матар, кој е обвинет за обид за убиство и напад, изјави за Њујорк Пост дека отишол во Бафало еден ден пред нападот, а потоа во Чаутаука, на околу 40 милји. Купил билет за трибината, а потоа ноќта пред закажаниот настап на Ружди во институтот спиел на тревата.

Семејството на Матар дошло во САД од Либан, прво се населило во Калифорнија, пред неговите родители да се разведат. Таткото се вратил во Либан, а мајката се преселила во Њу Џерси.

Мајката на Матар изјавила дека откако патувал на Блискиот Исток во 2018 година, каде што отишол да го види својот татко, нејзиниот син се вратил како променет човек и дека станал поповлечен и попосветен на исламот.