Надвор има оган, луѓе влегуваат, преземете нешто, апелирал водител при напад на антиваксери на кипарска телевизија

Противници на вакцинацијата и други противпандемиски мерки ја нападнале синоќа зградата на телевизиската станица Сигма на Кипар при што повеќе лица се повредени, некои и тешко.

Демонстрантите во својот агресивен поход запалиле автомобили на вработени во телевизијата, паркирани пре зградата, на која фрлале камења и запаливи средства, информираат кипарски медиуми. Во нападот повредени се 12 полицајци, двајца потешко. Уапсени се две лица.

Кипарскиот претседател Никос Анастасиадес на Твитер напиша дека овој напад е удар врз демократијата. Нападот се случил ноќе во време на директниот пренос на вестите.

– Надвор има оган и луѓето влегуваат во зградата. Ако полицијата не нè слуша, ве молам, преземете нешто – рекол во време на преносот видно потресен и преплашен водителот на емисијата.

Околу 2.000 демонстранти најпрво се собрале пред претседателската палата во Никозија, со барање оставка на претседателот Анастасиадес. Доцна вечерта тие дошле до зградата на телевизијата.

Според информациите од тамошните медиуми, граѓаните кои биле на протестот се верски фанатици и антиваксери, но и левичарски и десничарски екстремисти.

Демонстрантите ги критикуваат мерките за сузбивање на заразата, тие се противат на делумно задолжителното вакцинирање, мерка која од неодамна се применува на Кипар. Станува збор за вакцинација која е задолжителна за здравствените работници, или во спротивно тие ќе бидат избркани од работа без надомест.

За влез во ресторани или во државни институции граѓаните мора да покажат доказ за вакцинација или негативен тест, а тестирањето го плаќаат сами.