Над 2.300 медицински сестри и лекари чекаат вработување, а болниците кубурат со кадар

Вработување чекаат 2.098 медицински сестри и техничари и 279 лекари, додека болниците во земјава кубурат со кадар или тој е преморен од ангажманот во борбата со коронавирусот. Посебен проблем е отворањето на нови оддели за сместување на болни од ковид-19 во некои болници бидејќи болниците немаат кадар.

Десетици медицински лица од почетокот на пандемијата беа заразени со ковид -19, а неколкумина починаа како резултат на компликации предизвикани од вирусот. Болниците кубурат со персонал, а сѐ поголем е притисокот на заболени пациенти во сите инфективни одделенија во земјава, каде се бара кревет повеќе. Се полнат и модуларните болници кои беа отворени за згрижување на пациенти кои имаат посериозни компликации како резултат на вирусот.

Според податоците на Агенцијата за вработување, од крајот на октомври на листата на чекање за вработување се 939 медицински техничари, 873 општи медицински сестри, 13 медицински сестри со виша школа, како и 23 медицински со виша школа и 11 високостручни медицински сестри, 4 медицински сестри специјализирани за интензивна нега. Меѓу невработените медицински сестри има 150 бабици и 35 педагошки медицински сестри.

Меѓу оние што чекаат вработување се и 249 доктори по медицина, 19 доктори по општа медицина, 1 интернист и 10 доктори специјалисти од повеќе области.

Овој медицински кадар е на списокот на невработени од 11 месеци до 2 години.

Деновиве има информации дека одделни болници за потребите на ковид-центрите имаат огласи за прием на медицински кадар.

Новото крило во струмичката болница не може да проработи поради немање кадар, барем така изјавува тамошниот директор. Во градската болница „8 Септември“ проширувањето на ковид одделот чека да заврши конкурсот за вработување на медицински кадар.

Потреба од медицински кадар имаат и приватните болници и установи каде што најчесто завршува медицински кадар кој ги напушта јавните здравствени установи.