НА ПОВИДОК „ТЕПАЧКА“ ЗА МИЛИОНИТЕ НА БЕРЛУСКОНИ Кој колку ќе наследи од богатството на италијанскиот тајкун

Зад контроверзниот италијански политичар и бизнисмен Силвио Берлускони останува голема деловна империја и имот, па се поставува прашањето кој колку ќе наследи од неговото богатство.

Берлускони, кој почина вчера во миланската болница Сан Рафаеле на 87-годишна возраст, почнал да го стекнува своето богатство во 1960-тите години инвестирајќи во изградба на модерна станбена област во близина на Милано, пред да се прослави како медиумски тајкун.

Во текот на 1970-тите, тој ги прошири своите интереси со основање на ТВ-кабелската компанија Телемилано и купувањето на уште два кабелски канала во Италија.  Во 1978 година, овие канали беа инкорпорирани во неговата новоформирана семејна холдинг компанија Фининвест.

Преку Фининвест, Берлускони се здоби со големи удели во некои од најголемите европски медиумски компании и управува со комерцијални ТВ канали во Италија и Шпанија и поседува голем удел во германската Просибиен (ProSiebenSat.1.)

Фининвест има и мнозински удел во Мондадори, најголемиот издавач на книги и списанија во Италија, како и неколку банки и осигурителни компании.

Компанијата го продаде фудбалскиот клуб Милан по 31 година сопственост, но АЦ Монка сè уште е во сопственост на семејството Берлускони.

Според американскиот магазин Форбс, приватното богатство на Берлускони во моментот на неговата смрт изнесувало околу 6,8 милијарди долари. Сите негови компании и работни места потпаѓаат под матичната компанија Фининвест, а Марина Берлускони (56), најстарата ќерка на медиумскиот тајкун, е претседател на холдингот од 2005 година.

Фининвест со вчерашното соопштение најави дека засега ништо нема да се промени во компанијата, но останува да се види дали тоа е одржливо на подолг рок.

Берлускони никогаш јавно не објави кој треба да го наследи по неговата смрт, и кој ќе има најголема моќ во деловната империја, исто така ќе зависи од тоа како ги поделил своите акции – повеќе од 61 отсто од сопственоста на Фининвест, меѓу неговите наследници во тестаментот.

Покрај Марина, Берлускони има четири деца, од првиот брак на синот Пјеро Силвио (54), а од вториот брак на ќерките Барбара (38), Елеонора (37) и синот Луиџи (34). Пјер Силвио (53) е извршен директор на Медиа фор Јуроп (MediaForEurope), а Барбара и Луиџи се ко-директори на Марина во Фининвест. Сите негови деца имаат значителен удел во Фининвест.

Неговата последна партнерка Марта Фашина (33) со која Берлускони наводно не сакал да склучи официјален брак, поради евентуален спор со децата за наследство, нема удел во компанијата.