НА МАКРОН И НА БРИЖИТ ИМ ПРЕКИПЕ, ЌЕ ЈА ТУЖАТ ЗЛОНАМЕРНАТА КОМЕНТАТОРКА Овенс тврди дека Брижит е маж

Францускиот претседател Емануел Макрон и неговата сопруга Брижит поднесоа тужба за клевета против американската десничарска поткастерка Кандис Овенс, тврдејќи дека таа со години шири „немилосрдна кампања на лаги“ што ја прикажува Брижит како маж.

Тужбата беше поднесена во среда во Вишиот суд во Делавер, пишува Јутарни лист.

Според адвокатот на Макрон, Том Клер, Овенс „систематски и злонамерно шири апсурдни теории на заговор“ за француската прва дама, почнувајќи со видео објавено во март насловено како „Дали француската прва дама е маж?“.

Видеото беше промовирано на социјалните медиуми, а Овенс тврди дека тоа е „веројатно најголемиот политички скандал во историјата“.

Оттогаш, Овенс продолжи да објавува серија содржини за своите речиси 4,5 милиони следбеници на Јутјуб, вклучувајќи серија од повеќе делови наречена „Станувајќи Брижит“ и продавајќи стока со етикети што алудираат на теоријата.

Во тужбата се тврди дека таа била првата личност што ги изнесела овие тврдења пред американска и меѓународна публика и дека го сторила тоа за да стекне слава, да го зголеми својот досег и да оствари финансиска добивка.

Клер тврди дека Макронови постојано барале од Овенс да престане да шири лаги, а кога таа не го сторила тоа, тие решиле да тужат „како последно средство“. Во официјалниот поднесок се истакнува дека на Овенс ѝ биле доставени документи кои „несомнено докажуваат“ дека Брижит Макрон е родена како жена по име Брижит Троње, дека не е во роднинска врска со Емануел Макрон и дека двојката не е под ничија контрола или уцена, вклучително и наводната програма на ЦИА, како што сугерира Овенс.

„Со своите постапки, Овенс им предизвика огромна штета на Макронови, не само јавно, туку и на лично ниво“, се наведува во тужбата.

„Секој пат кога ќе ја напуштат куќата, тие се оптоварени со сознанието дека милиони луѓе ги слушнале и можеби поверувале во овие одвратни измислици. Тоа е инвазивно, дехуманизирачко и длабоко неправедно.“

Брижит Макрон веќе поднесе тужба во Франција во 2022 година против две жени кои ширеле слични тврдења. Иако таа победила во прв степен, жените добиле жалба и случајот ќе оди на повисок суд.

Во март оваа година, Макрон ја коментираше ситуацијата на еден настан во Париз, велејќи дека најтешкиот дел од претседателската должност е „справувањето со лаги и измислени приказни“.

– Луѓето на крајот им веруваат, а тие ви го уништуваат животот, дури и во најсветите приватни моменти – изјави Макрон.

Француската претседателска палата одби да коментира за случајот, наведувајќи дека станува збор за „приватна работа“.

Макронови бараат казнена отштета од Овенс во тужбата за клевета, нарушување на приватноста и обвинувања што создале лажна перцепција. Адвокатот на Клер не ја откри висината на отштетата што ја бараат, но рече дека износот „ќе биде значителен ако Овенс продолжи во овој правец“.

БРИЖИТ МАКРОН НЕ Е МАЖ Францускиот суд ги ослободи жените што ги ширеа гласините