НА ГАК ПОРОДЕНА ЖЕНА СО ЕКСТРАПЕРИТОНЕАЛЕН ЦАРСКИ РЕЗ Пациентката претходно имала три големи абдоменални операции
За првпат во поново време во нашата држава на Универзитетската Клиника за гинекологија и акушерство - ГАК бил извршен Екстраперитонеален царски рез кај 23-годишна трудница
На Универзитетската Клиника за гинекологија и акушерство – Скопје во петокот за првпат бил изведен екстраперитонеален царски рез врз трудница, а министерот за здравство Венко Филипче денеска на одделот пуерпериум при ГАК-Скопје ги посетил родилката и нејзиното новороденче. Станува збор за 23-годишна пациентка, која претходно имала три големи абдоменални операции заради повреди на внатрешни органи. Постоеле индикации нејзиното породување да заврши со царски рез, кој требало да се направи во интерес на бебето.
Екстраперитонеалниот царски рез е специфична техника на царски рез која е позната од пред 70 години и во поново време првпат е реафирмирана во Франција. Ваков вид на породување со царски рез освен во Франција се изведува во Брисел – Белгија, во Загреб – Хрватска, но и во Тунис во Северна Африка.
„Првпат во Македонија во петокот беше извршено породување со екстраперитонеален царски рез, со што ГАК-Скопје стана и прва клиника во регионот каде се примени оваа невообичаена техника. Среќен сум што по 30-годишно работно искуство на нашата клиника се роди бебе со екстраперитонеален царски рез, нешто за што сме слушале од повозрасните колеги. Пациентките со овој тип на царски рез побрзо и полесно се враќаат во нормален живот, нешто слично како после вагиналното породување. Бенефитот од екстраперитонеалниот царски рез е што родилката само неколку часа по операцијата може да се движи, да јаде, да пие и да му се посвети на своето новородено. Со оваа техника, се намалува и ризикот од внесување на интаабдоминални инфекции и намалување на сраслини на внатрешните и на репродуктивните органи, со што се намалува и можноста од постоперативен стерилитет“, изјави доц. д-р Игор Самарџиски, кој го изведе оперативниот зафат во петокот.
Самарџиски неодамна се врати од едукативен престој – активен курс во болница во Ница, Франција каде учествуваше во изведување на екстраперитонеални царски резови.
Инаку, техниката за екстраперитонеалниот царски рез е специфична, започнува во ист стил како и класичниот царски рез, но кон местото на сечењето на матката и вадењето на плодот се пристапува со посебна техника на странично избуткување на бешиката од местото каде што треба да се направи екстараперитонеалниот царски рез. Потоа следува специфично кружно шиење на отворот на матката, што исто така придонесува за намалување на времетраењето на интервенцијата и за подобро зараснување на местото каде е пресечена матката.