На Џафери му здодеа од калкулации, го впери прстот и кон внатрешниот конфликт во ДУИ

Отворениот конфликт помеѓу потпретседателот на ДУИ Изет Меџити и организацискиот секретар Артан Груби и министерот Бујар Османи, како и несогласувањето на сарајскиот градоначалник Блерим Беџети со дел од изборот на министри од ДУИ ја блокира и работата на институциите. Претседателот на Собранието Талат Џафери денеска на брифинг со новинарите потврди дека Парламентот не може да заседава, а како причина за тоа го наведе и недоаѓањето на пратениците од мнозинството, меѓу кои и тие од ДУИ. Тој најави разврска на ситуацијата, особено како што вели, за тие кои намерно не доаѓаат на седниците.

Причини за неможноста да се одржи седница има неколку, и тоа недоаѓање на сите пратеници од владејачкото мнозинство СДСМ и ДУИ поради коронакризата или други лични причини, проблемот во пратеничката група на ДУИ, како и противењето на опозициските партии да присуствуваат на седниците и да прават кворум за работа на Парламентот.

– Сите пратеници имаат обврска да дојдат на работа, а калкулациите се друга работа. Мислам дека ќе има разврска. Никој не кажува дека од ДУИ некој излегува како самостоен или независен. Тоа право го има секој од пратениците. Тоа не може никој да го казнува. А од друга страна да делувам како пратеник од таа пратеничка група, а да не доаѓам, е тоа веќе е лична одговорност – наведе Џафери.

Внатрешниот конфликт во ДУИ и по повеќе од една година од партискиот конгрес не дозволува да се оформат ни партиските тела, како и да се спроведе изборот на најдоверливите луѓе на лидерот Али Ахмети, брифираат за Плусинфо функционери од партијата.

По конгресот кој се одржа во декември 2019 година и на кој Ахмети беше резибран за лидер, избрано е само Генералното собрание. ДУИ сѐ уште функционира со старото Централно претседателство, а не е избрано ни најтесното партиско раководство – потпретседателите и генералниот и организацискиот секретар на партијата.

Партиски извори брифираат дека Ахмети не го отвора ова прашање за да избегне нови караници и тензии во партијата, но и дека немало „прилика“ за тоа бидејќи лани приоритетни биле парламентарните избори и формирањето на Владата. Така што ново Централно претседателство и раководство нема да има ни пред претстојниот попис, а можеби ни пред локалните избори наесен, велат од партијата.

Меџити не го крие судирот со Груби и веќе најави можна интерпелација за првиот вицепремиер. Тој и Блерим Беџети се налутија за изборот на Ахмети, Груби и Османи да бидат дел од новата Влада. Меџити му забележува на Груби и за тоа како раководи со Министерството за политички систем во врска со распределбата на рамковно вработените.

На последното Централно претседателство на ДУИ кое се одржа минатата недела, свикано од Груби, а на кое присуствувал и лидерот Ахмети, не дојде Меџити иако е претседател на чаирскиот огранок и потпретседател на партијата.

Во партијата има и размислувања дека Меџити веќе мора да пресече дали ќе оди до крај, односно да ја поднесе интерпелацијата за сопартиецот, која пратениците на ДУИ не би ја поддржале, по што ќе се очекува или да замине од партијата или да ја спушти топката за да се смират страстите. Но, и покрај обидите, не успеавме да добиеме одговор од Меџити за неговото дејствување.

Од друга страна, брифинзите се дека Меџити го одржува судирот со Груби, бидејќи амбициите му се да остане во најтесното раководство на ДУИ и дека атакува на позицијата генерален секретар на партијата, која веќе три години е празна, по смртта на Абдулаќим Адеми. Груби, пак, се споменува дека ќе остане на позицијата организациски секретар. Тој на таа функција дојде пред околу три години кога поради несогласување со партиските политики функцијата ја напушти Хазби Лика и се повлече од партијата. Официјален одговор од организацискиот секретар Груби не добивме кога партијата ќе го избере новото раководство и Централното претседателство.

За потпретседателските места извесно е дека Садула Дураку повеќе нема да биде потпретседател бидејќи отпадна од членството во Генералниот совет на партијата. Можно е актуелната потпретседателка Теута Арифи да си ја задржи позицијата, бидејќи како што велат партиски извори, нема жена која би можела да ја замени.

Потпретседателот Невзат Бејта не се очекува да остане на функција, доколку се кандидира за градоначалник на Гостивар, како што се најавува. За потпретседателската функција амбиции имал и Бујар Османи, а од липковскиот регион, нашите извори велат дека на местото на Дураку можно е нов потпретседател да биде актуелниот градоначалник Еркан Арифи. Сериозен кандидат за потпретседател е и Фатмир Дехари, доколку по третпат не атакува за градоначалник на Кичево. Сепак, како ќе го екипира најтесниот тим ќе зависи од Ахмети, кој го има последниот збор.

Од Генералното собрание, кое единствено беше формирано по конгресот, од звучните имиња од ДУИ, отпаднаа Муса Џафери, Рафиз, Алити, Хазби Лика, Беќир Асани. Членовите на Централното претседателство треба да се и членови на Генералното Собрание. Актуелните потпретседатели Теута Арифи, Садула Дураку, Изет Меџити и Невзат Бејта на таа функција се веќе два или три мандата.