НА 14 НОЕМВРИ ИЗБОРИ ВО БУГАРИЈА „Два во еден“ ќе заштедат трошоци на државата и времето на гласачите
Во Бугарија ќе се одржат заедно претседателските и предвремените парламентарни избори.
Претседателот на Бугарија Румен Радев најави дека ќе го распушти 46. Народно собрание што е можно поскоро во согласност со процедурата и Уставот.
Како што јави дописникот на МИА од Софија, претседателските и предвремените парламентарни избори во Бугарија ќе се одржат на 14 ноември.
Според Радев, изборите во формат „два во еден“ ќе заштедат државни трошоци и време на гласачите.
Тој не коментираше дали ќе направи промени во привремената влада во Бугарија, како што тоа му го овозможува Уставот на земјата.
Радев рече дека е жесток поддржувач на надпартискиот договор и ќе смета на поддршката од сите угледни бугарски граѓани.
Тој смета дека оваа изборна кампања во Бугарија ќе биде уште еден водич за бугарските гласачи за тоа кои партии и политичари работат за иднината и кои ги бранат корупциските шеми.
Радев рече дека поддржува поединци, а не партии и дека не овластува никого да зборува во негово име.