МУ РЕКОВ ДА ЈА НОСИ ЛЕНТАТА ВО КАТАР, А ТОЈ ЈА СТАВИЛ ВО СКОПЈЕ Капитенот Стефан Ристовски вчера настапил со подарокот од Горан Пандев

Капитенската лента што вчера ја носеше Стефан Ристовски на натпреварот на Македонија против Исланд била подарок од легендарниот македонски фудбалер Горан Пандев.

Поранешниот капитен во изјава за Спортски открива дека тој лично на Стефан Ристовски му ја подарил капитенската лента што ја носел на својата рака на натпреварот против Холандија на Европското првенство.

– По натпреварот со Холандија на Европското првенство, јас му ја подарив капитенската лента на Стефан Ристовски. Тогаш му реков да ја носи на Светското првенство во Катар, а тој ја ставил вчера – низ смеа искоментирал Пандев.

Репрезентацијата на Македонија синоќа ја победи селекцијата на Исланд со 3:1 и го обезбеди второто место во групата кое води во баражот за пласман на Светското првенство во Катар идната година.

Баражот ќе се игра согласно новиот модел на ФИФА, слично како и во плеј-офот од Лигата на нации за пласман на ЕВРО 2020, во кој вкупно 12 селекции (10 второпласирани од квалификациските групи и плус уште две репрезентации од Лигата на нации) ќе бидат поделени во три групи по четири репрезентации.

Притоа со жрепката од Цирих ќе биде одредена во која група ќе е Македонија заедно со уште три селекции. Репрезентациите пред ждрепката ќе бидат поделени во две групи по шест – носители и неносители. Тоа ќе се одлучува врз основа на ефектот од квалификациите, но Македонија ќе биде меѓу неносителите, што значи полуфиналето од баражот ќе го игра на теренот на противникот кој ќе биде од листата носители. Ако триумфира во полуфиналето македонската репрезентација може финалниот натпревар за пласман на СП 2022 да го игра на домашен терен, што ќе биде одредено исто така на ждрепката на 26. ноември.

Првите натпревари од баражот за пласман на Мундијалот ќе се играат на 24/25. март, а финалните на 28/29. март следната година. Можни противници на Макеоднија се Шкотска, Португалија, Шведска, Русија, Полска, Италија или Швајцарија, Финска или Украина, Велс или Чешка, Норвешка или Турција.