МОТОРЏИИТЕ НА УДАР НА СКОПСКАТА ПОЛИЦИЈА Казни за 91 возач, одземени неколку мотоцикли

Дури 91 сообраќаен прекршок биле констатирани вчера во засилена полициска акција во неколку скопски општини. Контролите се спроведувале во Центар, Аеродром, Бит Пазар и Чаир, каде на удар биле возачите на мотоцикли, велосипеди со помошен мотор, трицикли и четирицикли.

Од вкупниот број санкции, седум се кривични пријави за безобѕирно управување со моторно возило. Во шест случаи станува збор за возење без возачка дозвола, а во еден за управување под дејство на алкохол со над 1,50 промили. Три од кривичните пријави се поднесени против малолетници.

Полицијата изрекла и 17 мерки за управување возило во несоодветна категорија, како и 13 санкции за возачи на велосипеди со помошен мотор кои немале соодветна потврда. Најголем дел од прекршоците – дури 43 – се однесуваат на возење без заштитна кацига.

Дополнително, санкционирани биле три нерегистрирани мотоцикли, еден возач бил казнет за возење под дејство на алкохол, а уште седум мерки биле изречени за други прекршоци.

Во текот на акцијата бил одземен еден мотоцикл поради безобѕирно управување, а привремено биле одземени уште два мотоцикли кои биле нерегистрирани подолго од шест месеци.

Од полицијата најавуваат дека ваквите засилени контроли ќе продолжат и во наредниот период со цел зголемување на безбедноста на улиците.