МОСКВА ПОДГОТВУВА ЕСЕНСКА ОФАНЗИВА Русија најавува нови цели, Киев подготвен за отпор
Москва бара украинско повлекување од Доњецк како услов за прекин на огнот, но Киев одбива и најавува одбрана на Славјанск и Краматорск.
Командантот на руската армија, генерал-полковник Валериј Герасимов, најави дека инвазијата во Украина ќе продолжи со нови цели во рамки на есенската офанзива, и покрај зголемените повици од Западот за почеток на преговори.
– Во моментов, нападите се во тек на целата линија на фронтот. Денеска ги дефинираме задачите на поединечните групи на вооружените сили за есенскиот период – изјави Герасимов.
Според него, руската армија сега контролира 99,7 отсто од регионот Луганск, 79 отсто од Доњецк, 76 отсто од Херсон и 74 отсто од Запорожје. Како предуслов за прекин на огнот, Москва бара украинските сили целосно да се повлечат од Доњецк.
Украинскиот претседател Володимир Зеленски ги одби овие услови и порача дека Украина нема да се откаже од Славјанск и Краматорск – клучни одбранбени упоришта на истокот.
Рускиот преговарач Кирил Дмитриев, пак, ги обвини западните сојузници на Киев дека со „нереални барања“ го продолжуваат конфликтот. – ЕУ треба да престане да го саботира мировниот процес – истакна Дмитриев.
Москва досега ја отфрли можноста европските земји да испратат свои воени сили во Украина за надзор на евентуален мировен договор, додека европските лидери возвраќаат дека Кремљ всушност купува време за нови напади.