МОЌТА НА ВРЕДИ ГИ УНИШТИ ПЛАНОВИТЕ НА ДУИ И НА ТАРАВАРИ СО КЛАНОТ ЃОКА Кампањата против вицепремиерот Фетаи е доказ за нашата чесност, порача Вреди

Пропагандната машина на ДУИ и нејзините патерици почна ниска кампања на клевети и лаги против вицепремиерот, Арбен Фетаи и криејќи се зад лажни профили и со валкани методи се обидува да ја оцрни неговата личност и да го попречи процесот на промени што сега стана незапирлив, соопшти коалицијата Вреди.

„Овие напади докажуваат само едно: моќта на Вреди ги уништи плановите на ДУИ и на Арбен Таравари со кланот Ѓока. Тие се плашат од транспарентноста, од чистите раце и од нашата решеност да ги искорениме злоупотребите, корупцијата и мафијашките врски што ја држат државата како заложник две децении“, соопшти Вреди.

Вреди има фундаментална разлика со ДУИ и нејзините патерици, се додава во соопштението.

„Ниту еден јавен денар не е злоупотребен од нашите претставници. Нивното богатство и интегритет се отворена книга, секој цент е заработен чесно. Без компромис и без контакт со ДУИ, нашата дистанца е јасна, бидејќи секој што ќе ја допре ДУИ е извалкан од нивното морално распаѓање. Нашето донесување одлуки е слободно, без влијанија и неуценето, бидејќи нашата единствена зависност е од нашиот народ и нација, а не од олигарси и нарко-босови. Затоа, нивните напади оркестрирани од зад сцената се едноставно очај“, се вели во соопштението.

Тие не се осмелуваат да се соочат со вистински обвинувања, факти и аргументи, се додава, бидејќи знаат дека Вреди е олицетворение на чисти раце и чесна политика.

„Нека клеветат со лажни профили, нека лаат нивните дигитални платеници, караванот Вреди незапирливо се движи напред, градејќи иднина каде што Албанците се посилни, а не експлоатирани, иднина без ДУИ, без патерици и без заложниците на Ѓока“, соопшти коалицијата Вреди.