МНР ЈА ОТПОВИКА ДИПЛОМАТСКАТА НОТА НА ВЕСЕЛ МЕМЕДИ Амбасадорот во Рим самоиницијативно се истрчал да ги прогласи пасошите за неважечки

Министерството за надворешни работи по дипломатски пат веднаш ја отповикало дипломатската нота што ја изпратил македонскиот амбасадор во Рим, Весел Мемеди до италијанското МНР во која ги известува дека валидните пасоши со името Република Македонија од 12 февруари се неважечки.

Во одговор на медиумските наводи за испратена нота до италијанското МНР, Министерството за надворешни работи информира дека ниту едно дипломатско – конзуларно претставништво на Република Северна Македонија нема добиено инструкција да доставува ноти за предметната тема до земјите на акредитација.

Ова го велат од МНР за МИА, по наводите објавени во дел од македонскиите медиуми, дека амбасадорот во Рим, Весел Мемеди, самоиницијативно до италијанските власти доставил нота во која ги известил дека и валидните патни исправи со името Република Македонија од 12 февруари се неважечки.

„По добиените сознанија за испратената нота до италијанското МНР, истата по дипломатски пат веднаш е отповикана, уште пред стапување во сила на наведениот рок за важноста на пасошите и со тоа, не предизвика никакви импликации“ – стои во соопштението на МНР.

Министерството веќе спроведува интерна постапка за утврдување на одговорност за расчистување на случајот, додаваат оттаму.

СКАНДАЛОЗЕН ДОПИС ДО ИТАЛИЈАНСКИТЕ ВЛАСТИ ОД МАКЕДОНСКИОТ АМБАСАДОР ВО РИМ Весел Мемеди со нота ги известил дека 100.000 македонски пасоши со „Република Македонија“ се неважечки!?