МИРОТ ВО УКРАИНА E СÈ УШТЕ ДАЛЕКУ Трилатералните преговори продолжуваат утре
Преговорите во Абу Даби продолжуваат утре, најавен и билатерален состанок меѓу Украина и САД.
Украинскиот преговарачки тим го заврши првиот ден од трилатералните разговори со Русија и Соединетите Американски Држави, кои се одржуваат во Абу Даби, со цел изнаоѓање решение за војната меѓу Украина и Русија.
Информацијата ја потврди Дијана Давитјан, портпаролка на секретарот на Советот за национална безбедност и одбрана Рустем Умјеров, јавува „Украинска правда“.
– Преговорите се завршени за денес – изјави Давитјан, додавајќи дека разговорите ќе продолжат во четврток, на 5 февруари.
Во составот на украинската делегација учествуваат Рустем Умјеров, шефот на военото разузнавање Кирил Буданов, заменик-шефот на кабинетот на претседателот Сергеј Кислица, пратеникот Давид Арахамија, началникот на Генералштабот Андриј Хнатов, како и советникот на претседателската администрација Александар Бевз.
Умјеров најави и билатерален состанок со американската делегација, во која се Џаред Кушнер, зет на американскиот претседател Доналд Трамп, и специјалниот пратеник Стив Виткоф.
– На билатералната средба ќе се разговара за документ за безбедносни гаранции и за таканаречениот „план за просперитет“ – соопшти Умјеров.
Трилатералните разговори во Обединетите Арапски Емирати се одржуваат по серијата масовни руски напади врз Украина, што дополнително ја усложнија безбедносната состојба.
Украинскиот претседател Володимир Зеленски претходно изјави дека работата на украинската делегација во мировните преговори ќе биде прилагодена на новонастанатите безбедносни услови, нагласувајќи дека приоритет остануваат заштитата на државата и безбедносните гаранции за Украина.