Министри, директори и водителка меѓу новите 10 советници на премиерот Зоран Заев

Десет нови имиња се додадени на листата на советници  и надворешни советници на премиерот Зоран Заев. Дел од нив се поранешни министри и директори,, но и водителка и  луѓе од други професии ќе  го советуваат премиерот за плата од 40.000 до над 55.000 денари. Листата на советници во канцеларијата на премиерот се зголеми од 23 на 29 лица.

На листата се најдоа поранешните министери Аксел Ахмедовски кој сега е советник за правни прашања и  Едмонд Адеми кој  е советник за надворешни работи.Тие месечно ќе добиваат по 55.268 денари.

За истиот месечен износ и поранешниот директор на Агенцијата за храна и ветеринарство Зоран Атанасов ќе го советува премиерот за земјоделство и безбедност на храна, а неговиот поранешен колега од „Македонски шуми“ Зоран Ѓорѓиев е советник за спроведување реформи во шумарството. Истиот износ ќе го прима и поранешниот  директор на АД за „Аеродромски услуги“ Виктор Петрушевски кој е нов советник за локална самоуправа.

Меѓу новоназначените советници се и Силвија Митевска советник за спорт и водителката Елена Митева за организација на медиумски активности.И тие ќе добиваат по 55.268 денари месечно за советите.

Нови три имиња има и на листата на надворешни соработници во канцеларијата на Заев. Спасе Додевски е надворешен соработник за унапредување на образованието, здравствената и социјалната заштита, за што ќе добива 46.000 денари, Драган Василевски  ќе го советува премиерот за одбрана за што ќе биде платен со 40.000 денари, а за истата сума  Дејан Николовски ќе дели совети за инвестиции помеѓу општините и Владата.

Според пресметките, 29-те советници на премиерот Заев ја чинат државата близу 27.000 евра месечно, или вкупно, советниците и надворешните соработници на премиерот на годишно ниво ја чинат државата близу 380.000 евра.