Мицкоски за „северна“ на парите: Наместо со пандемијата, се занимаваат со работи што никој не ги бара од нас! ВИДЕО

Некои работи едноставно ја поминуваат границата на рубиконот и не можам да ги разберам. Ќе дојде ново парламентарно мнозинство и ќе ги реотвори сите овие уредби и ќе разговараме тогаш, одговори Христијан Мицкоски на новинарско прашање да ја коментира владината одлука, објавена пред два дена во Службен весник за менување на парите, со додавање на зборот  „Северна“, секаде каде на нив е споменат зборот Македонија. 

– Има многу спорни уредби со сила на закон коишто се носат во оваа вонредна состојба, една од тие споредни уредби е и оваа. Навистина не можам да разберам наместо да се занимаваме со она коешто ни е најважно и најзначајно, а тоа е справување со пандемијата и борбата за животите на нашите граѓани, ние се занимаваме со споредни работи коишто никој од нас впрочем не ги бара. Па дури и да го читаме оној договор којшто беше потпишан оваа работа не се бара од нас бидејќи тоа може да се направи во следните 5 години, ако се отвори  седумнаесетото поглавје, а тоа е поглавјето за економија и монетарна политика. Така што апсолутно не можам да разберам наместо да се занимаваат и да носат уредби кои што се поврзани со пандемијата и што повеќе животи да бидат спасени и тие луѓе коишто се во првите борбени редови да ги мотивираме, ние носиме уредби коишто апсолутно немаат никакво значење. Некои работи едноставно ја поминуваат границата на рубиконот и не можам да ги разберам. Ќе дојде ново парламентарно мнозинство и ќе ги реотвори сите овие уредби и ќе разговараме тогаш – одговори Мицкоски.

 На прашање дали претседателот на ВМРО-ДПМНЕ и партиската делегација по средбата со министерот за надворешни на Унгарија, Сијарто, ќе одат во 14 дневна самоизолацција со оглед на тоа дека имаат директен контакт со странци, Мицкоски вели:

– Мислам дека уредбата не е баш таква, она што е пропишано со законите ние секогаш сме го почитувале и во тоа нема дилема, но мислам дека во овој случај такво нешто ќе нема потреба.

Мицкоски на конференцијата со министерот за надворешни работи и трговија на Унгарија Петар Сијарто. изрази надеж дека дел од помошта што стигнала денеска ќе стигне таму каде што е најпотребна, во МВР, каде им се потребни маски, а скафандерите на Инфективната клиника и во други болници. Тој изрази и жалење за смртните случаи и за тоа што бројот на инфицирани со коронавирус се зголемува.

Сијарто од своја страна, потврди дека неговата посета на Скопје е на барање на лидерот на опозицијата.

– Причината што сум денеска тука е телефонскиот повик на Христијан од минатата недела. Во тој повик тој истакна дека е потребна хуманитарна помош од Унгарија во овој период за да се надмине проблемот со справување со пандемијата и затоа одлучивме да помогнеме на пријателскиот народ на Северна Македонија и денеска донесовме 100.000 маски и 5.000 заштитни комбинезони со цел да се помогне на мерките за заштита – рече Сијарто.

Тој повтори дека можат да си ја дозволат таа помош бидејќи поврзувањето меѓу Кина и Унгарија оди многу добро, и добиле линија за производство од Кина при што сега самите можат да произведуваат маски.

Сијарто истакна оти донацијата ја предал на министерот за внатрешни работи Наќе Чулев со цел полициските службеници да можат да ја вршат работата што повеќе заштитени, и тоа е важно, како што рече, бидејќи полицијата учествува и во заштитата на јужната граница од напливот на мигранти, што за Унгарија е уште од поголемо значење.

Тој додаде дека досега унгарски полицајци учествувале со македонските во заштита на границата, а во координација со министерот за внатрешни работи, како што рече, задоволство ни е да продолжиме со упатување на дополнителни унгарски полициски службеници на јужната граница.

На новинрско прашање зошто одржува прес-конференција и со лидер на опозиција, Сијарто одговори дека како министер за надворешни работи се сретнал и со својот македонски колега и не гледа која е спорната ситуација да се сретне и со претставниците на нивната сестринска партија, кога доаѓа на нивна покана.