Мицкоски: Предложив да зборуваме за проблемот со Бугарија, Заев одби

Лидерот на ВМРО-ДПМНЕ Христијан Мицкоски по завршувањето на лидерската средба кај претседателот Пендаровски истакна дека побарал дневниот ред на средбата да биде проширен со уште една точка за разговор, односно да се дискутира за проблемот со Бугарија, но како што кажа, тоа било одбиено од страна на претседателот на СДСМ Зоран Заев.

– Во воведниот дел претседателот Пендаровски побара од присутните да го дополнат дневниот ред доколку чувствуваат дека тој дневен ред да биде дополнет. Јас земав збор и предложив содржината на дневниот ред биде дополнета со уште една точка – проблемите кои што ние ги имаме со нашиот источен сосед во делот на негирање на идентитетот, на идентитетските прашања, што објективно може да биде реална пречка за напредокот на Република Македонија во евроинтеграциите. За жал, немаше консензус, односно претседателот на СДСМ одби да разговара за оваа точка да биде дел од дневен ред. Жалам што ја испуштивме оваа можност заеднички да изградиме консензуален став околу националните приоритети кои што понатаму треба да ни бидат водилка како ќе пристапуваме кон ЕУ. Се надевам дека ќе се осмелат и охрабрат во некоја наредна средба заеднички да усвоиме став и позиција со која што ќе настапуваме во иднина во процесот на преговори – истакна Мицкоски.