МИЦКОСКИ ПОБАРАЛ ФИЛИПЧЕ ДА БИДЕ КОНСТРУКТИВЕН „Државата мора да биде во служба на граѓаните и да се случат коренити реформи на системот“
Соговорниците се договорија да се формираат работни групи кои ќе разговараат за реформските законски решенија кои треба да ги гарантираат заложбите за напредок, соопшти Владата по средбата на премиерот Христијан Мицкоски и претседателот на СДСМ Венко Филипче.
На средбата меѓу претседателот на Владата Христијан Мицкоски и претседателот на СДСМ Венко Филипче беше истакната потребата да се работи на заедничката иднина за граѓаните, како и да се работи на консензус меѓу различните страни за клучните прашања за државата и добробит на сите граѓани, соопшти Владата.
Во тој контекст неопходно е да се мобилизираат сите напредни поединци и структури кои можат да дадат придонес на патот за развој на земјата, се додава во соопштението.
Македонските државни интереси треба да бидат појдовната точка во разговорите за секое прашање, при што Мицкоски побара од Филипче да се потруди да биде конструктивен фактор во определбата за промени, реформи и напредок, соопшти Владата.
„Државата мора да биде во служба на граѓаните и да се случат коренити реформи на системот од кој граѓаните се незадоволни“, истакна Мицкоски на средбата, соопшти Владата.
Соговорниците се договорија да се формираат работни групи кои ќе разговараат за реформските законски решенија кои треба да ги гарантираат заложбите за напредок.