МИЦКОСКИ ПОБАРА ГРАЃАНИТЕ ДА НАПРАВАТ РАЗЛИКА Ние нудиме проекти и знаење, а тие сакаат да мислите дека сме исти

Ова се навидум локални избори. Но ако се погледне подлабоко, се нешто повеќе од тоа. Од нив зависат многу работи, сите поврзани со иднината на нашата Македонија. На овие избори или ќе продолжи државата да функционира на ваков начин како изминатите години и ќе бидеме сведоци на уште продлабочена корупција, хаос, не функционирање на системот, отсуство на одговорност, немање правда, социјални и економски проблеми и стагнација на државата, експериментирање во образованието, пропаѓање и  нехуман однос кон земјоделците, или ќе создадеме сите заедно една нова поинаква, различна, подобра иднина.

Ова меѓу другото го рече лидерот на ВМРО-ДПМНЕ Христијан Мицкоски на митингот во Охрид со кој партијата ја почна кампањата за локалните избори.

– Дали сме подготвени да им подариме уште четири години на истите луѓе кои веќе два пати до сега ги изневерија очекувањата, не го одржаа зборот, даваа лажни ветувања, и потонаа опиени во својата моќ и ароганција, во корупција, играјќи си со вашите животи.Дали во наредните години премиерот Зоран Заев треба да има повторно апсолутна власт? Дали сметате дека Заев и неговите луѓе се најдоброто што оваа земја го заслужува, или сите вие сте најдоброто и вие сте тие кои знаат да оценат што е најдобро, а што не е? Ако до сега работеа на ваков начин со сите проблеми кои ги создадоа, неправди, измами, неспособност и неодговорност која ја демонстрираа, дали ќе може да очекуваме од нив нешто поразлично, подобра иднина? – праша Мицкоски

Тој нагласи дека разликата меѓу понудите на ВМРО-ДПМНЕ и СДСМ е непремостлива, јасна, иако власта очајно сака да прикаже дека сите се исти.

– Исто така тие сакаат да ве убедат дека тие се најдоброто нешто што може да ви се случи, и дека реалноста во која живеете е розова и најдобра. Дали е тоа така, вие најдобро знаете. Дали живеете најдобро како што тие ве убедуваат? Дали сметате дека со нив ви е најдобро или дека заслужувате подобро од се ова што се случува? Не се сите исти – рече тој.

Тој додаде дека овие избори се можност граѓаните да кажат што мислат за аферите и скандалите, а измамите .

– Ве повикуваме и замолуваме да се потсетите на работите кои власта очајно сака да ги заборавите, и да донесете вистинска одлука за себе и своето семејство, за иднината која што ја сакате и која што заслужувате. Вие да кажете што е најдоброто за вас затоа што вие го знаете тоа, а не тие да ви кажуваат самите дека биле  најдобри, затоа што сите знаеме, буквално секој еден граѓанин во нашата Македонија знае дека тие се всушност најлошото – рече лидерот на ВМРО-ДПМНЕ .

Мицкоски најави програма со многу знаење и проекти.

– Ние имаме знаење и програма со многу проекти, ние гарантираме дека ќе ја исполниме и вие знаете дека може да верувате на нашиот даден збор. Поучени сме од грешките на минатото и со поправени и искоренети слабости, ние сме луѓе, квалификувани, чесни и свесни за околностите и одговорноста која ја преземаме. Создадовме нова иднина кај нас, сакаме обединети со вас да создадеме нова иднина за сите нас. На овие избори влегуваме со чисто срце и ја бараме вашата доверба, ви ветуваме многу работа и конкретни резултати. Новата иднина започнува со промените, после кои следат проектите, новата иднина ќе донесе победи, и нова влада и парламентарно мнозинство во Македонија. А тие сакаат да мислите дека сите сме исти и тоа е дел на нивната пропаганда, за да останете  разочарани и така да го бараат својот спас. Со малата излезеност, со вашето негласање или нивните тројански експерименти, многу сум прецизен тројански експерименти во опозицијата, немојте да верувате на слугите на власта кои се тројански елементи во опозицијата – тие добиваат најмногу – рече лидерот на ВМРО-ДПМНЕ.

Мицкоски посочи дека време е за нова страница, за нова борба, за нов патриотизам кој што ќе не обедини,  треба да се надраснат поделбите бидејќи борбата е заедничка.

– Државата ќе ни даде нам, кога и ние ќе направиме нешто за нашата Македонија. За ВМРО-ДПМНЕ ова е битка за чест, и достоинство, така било секогаш било во историјата. Најодлучните ги обединувало, најпаметните го сонувале она што денес го имаме, и треба да го развиеме. Овој пат тоа е бајракот на успехот, надежта и иднината. Тоа е твој бајрак. И сите оние кои сега ме слушаат и се двоумат или имаат било каква задршка сакам да ви го порачам следното – знај го носам и твојот бајрак, а под него има место за сите. И за тебе, и за твоите блиски зошто ова е и твојата битка. Зошто Македонија е наша и единствена -рече тој.

Мицкоски рече дека за него победа е кога ќе се избориме за повисоки плати,  кога Македонија ќе ги сруши границите и ќе биде дел од Европа.

– За мене победа е кога нема да има разлика во Австрија со стандардот. За мене победа е кога ќе се бориме за среќата на нашите деца. За мене победа е кога ќе има одговорност за оние 14 загубени животи во Тетово, и кога заеднички ќе славиме за 14 спасени животи. За мене е победа кога криминалците ќе одговараат, а чесните ќе победуваат. За мене е победа силна и заедничка просперитетна Македонија – нагласи Мицкоски.