Мицкоски: Нема реформи со Кацарска како уставен судија

Христијан Мицкоски, претседател на ВМРО-ДПМНЕ во гостување во емисијата „Топ Тема“ зборуваше за процесот на интеграција кој и следува на Република Македонија и рече дека ВМРО-ДПМНЕ ќе ги поддржи сите најдобри судски процеси од ЕУ, но суштината е како тоа ќе се применува.

– Сите најдобри закони да ги препишеме и да ги имплементираме во Македонија ќе ги поддржиме. Сето тоа на хартија убаво изгледа, но поентата е како тоа во пракса да се применува јас токму тоа се обидувам да објаснам затоа луѓето се чувствуваат разочарани и обесправени. Јас ви давам збор дека ВМРО-ДПМНЕ сите најдобри судски пракси од ЕУ ќе ги поддржи, тоа не е суштината. Суштината е како тоа се применува –  додаде Мицкоски.

Тој посочи дека граѓаните немаат доверба во системот и немаат доверба во правосудството. Според него со Добрила Кацарска како уставен судија не може да има реформи во правосудството.

– Проблемот во Македонија е што, граѓаните, младите луѓе, оние повозрасните, сите, немаат доверба во системот, затоа што се чувствуваат беспомошно. Денеска гледаме дека Добрила Кацарска ќе стане Уставен судија, ќе добие унапредување поради тоа што добро одработила изминатиот период. Не може да има реформи со неа. Видете и кој го избира Судскиот совет кој неа ја предлага. Вие не можете да имате доверба во судството, ќе се чувствувате обесправени секогаш, затоа што ние гледаме како политичар бара мито и тој политичар поради процедурални причини е на слобода – вели Мицкоски.

Тој додаде да не се заборави дека Судскиот совет денес ја предложи Добрила Кацарска да биде унапредена како Уставен судија, но на самата Кацарска неодамна од страна на Уставниот суд и беа поништени решенија како противуставни.