МИЦКОСКИ НЕМА ДА СЕ ЗАНИМАВА СО КОСКИ ОД МИНАТОТО Премиерот вели дека неговиот фокус се идните генерации

Премиерот Христијан Мицкоски порача дека неговата задача не е да се занимава со „коски од минатото“, туку да обезбеди иднина за идните генерации. Осврнувајќи се на спорот со Бугарија, тој истакна дека е важно Македонија да биде трпелива и мудра во процесот на европска интеграција, но и да не отстапува од своите национални интереси.

– Мојата задача како премиер не е да се занимавам со коски што припаѓаат на минатото, туку со обезбедување иднина што им припаѓа на нашите деца. Да учиме од грешките од минатото. И затоа седнавме на маса за дијалог, од која тие долго бегаа и велеа дека тоа е невозможно. Не велам дека тоа е само мој успех, но е заеднички чекор напред – порача Мицкоски на Свечената академија по повод 23 Октомври – Денот на македонската револуционерна борба.

Мицкоски истакна дека членството во Европската Унија е важно за Македонија да може рамноправно да учествува во процесите на одлучување и да ги брани своите интереси.

Според него, Бугарија почнала да ги отвора прашањата за добрососедските односи и историските личности откако станала членка на ЕУ, користејќи ги механизмите на Унијата за да го блокира македонскиот евроинтегративен процес.

– Ете затоа е важно и ние да бидеме таму, а нашата борба за таа цел мора да биде исполнета со мудрост, знаење и единство. Ова не го кажувам за да укажам на неправедните игри кон нашата татковина, туку поради потребата да бидеме трпеливи и да дејствуваме на долги патеки – рече Мицкоски.

Тој нагласи дека нема да реагира импулсивно на провокациите и притисоците, туку ќе одговара со разум, принципи и отпорност. Политиката, како што посочи, ја гледа како маратон, а не како трка на 100 метри.

Мицкоски порача дека нема да отстапи од она што го смета за интерес на македонскиот народ, ниту од политиката што ги застапува македонските национални интереси.

– И Бугарија да договори стотина како опозицијата, кои ќе велат: „Бланко внеси ги Бугарите во Уставот, па потоа сè друго“, одговорот ќе биде дека никогаш нема да отстапам од она што е интерес на мојот народ. Ниту има сила што ќе ме поколеба да водам исправна промакедонска политика. Затоа што за сите нив најчудно е и најголем грев е да си Македонец што се бори за македонските интереси. Може сè да ти простат, но да си свој на своето – не. И народот тоа многу добро го гледа, а тоа го покажуваат и бројките од анкетите. Народот знае дека тие се мекото ткиво на нашата татковина – истакна премиерот.

Осврнувајќи се на историските прашања, Мицкоски рече дека македонското историско паметење не зависи од одобрувањето на други и дека никакви притисоци не можат да ја избришат улогата на Гоце Делчев во македонската историја.

– А на оние што се кројачи на историјата и мислат дека со вето можат да ни ја прекројат историјата, им порачувам: нашето паметење не подлежи на нивно одобрување. Ниту еден притисок не може да го избрише Гоце Делчев од срцето на македонскиот народ. Затоа што Гоце е вткаен во нашата борба, во нашата слобода, во нашето постоење… Гоце е Македонија! – порача Мицкоски.

Во обраќањето, премиерот се осврна и на безбедносните состојби во Европа и на Балканот. Тој оцени дека растот на протестите и насилството, како и активностите на различни служби во регионот, создаваат ризик од обиди туѓите проблеми да се пренесат во земјава.

Мицкоски предупреди на можни провокации и обиди за наметнување етнички теми, повикувајќи ги граѓаните да бидат внимателни и да не подлегнуваат на манипулации.

– Затоа е многу важно народот да биде високо свесен, да не потпаѓа на разни провокации и да не се наметнуваат вештачки прашања или хиперболизирани етнички теми. На тој начин, профитерите од таквите кризи нема да бидат меѓу народот, туку оние што со децении живеат на грбот на народот – рече Мицкоски.

Тој порача дека нема да дозволи, како што рече, нечесни игри и политички авантури. Државата, според него, треба да се води со отвореност кон реалноста, разбирање за потребите на граѓаните и подготвеност да се исправат направените грешки.

– Ќе има тешкотии и ќе има одлуки за кои ќе се водат сериозни расправи. Нашата обврска е да објасниме, да сослушаме, да признаеме кога нешто треба да се поправи и да го поправиме. Држава се води со отворени очи за стварноста и со чувство за животот на луѓето – порача Мицкоски.