МИЦКОСКИ НАЈАВИ ИНВЕСТИЦИСКА АКТИВНОСТ ОД 700 МИЛИОНИ ЕВРА Владата ќе плати камата на кредит од 100 милиони евра кој не се користел со години?

Премиерот Христијан Мицкоски најави инвестициска активност од 700 милиони евра за македонските компании, нешто што ќе влијае позитивно не само за бизнисот, туку и Бруто домашниот производ, но пред сѐ за отворање нови работни места.

Тој појасни дека компаниите нема да добијат само 250 милиони евра поддршка обезбедени од Унгарија, туку целта е да се креира еден систем кој ќе функционира не од денес за утре, туку и во иднина, како и тоа дека компаниите нема да се делат, туку пари ќе добијат сите кои исполнуваат услови.

– Кажав дека не се само тие 250 милиони евра. Имаме една кредитна линија која е на располагање, долго време не се користи, тоа се дополнителни 100 милиони евра од Европската инвестициска банка. Ја разгледуваме можноста Владата да ја плати каматата за да може бизнисот да го користи кредитот, односно главнината. Тоа се 350 милиони евра и ценам дека оваа помош, барем со уште 350 милиони евра дополнителни кои ќе дојдат од бизнисот, ќе заокружи една инвестициска активност од 700 милиони евра, што ќе влијае врз Бруто домашниот производ и ќе влијае на пазарот на труд, ќе отвори нови работни места – изјави премиерот Мицкоски одговарајќи на новинарско прашање по средбата со бизнисмените во Стопанската комора.

Премиерот Мицкоски нагласи дека се работи за еден комплексен процес кој не е за политички поени или за популизам, туку целта е како држава да бидеме водечка во регионот, а не на дното и да гледаме како другите нѐ претркуваат.

– Што се однесува до другиот дијалог со синдикатот ние стоиме на располагање, ќе разговараме и мораме да водиме сметка за иднината на држава. Затоа што ако немаме здрава економија ќе немаме ни вработени. Тоа е многу важно, затоа што колку повеќе се празни државата толку помали ќе се приходите во буџетот, толку помалку пари за плати, пензии, капитални инвестиции, поддршка. Тоа е еден систем, ние мораме тој систем да го организираме да функционира беспрекорно ако сакаме сите заедно да бидеме среќни, тука нема кој добил или изгубил, еден ако изгуби, сите губиме. Мора низ дијалог да седнеме да направиме систем кој ќе функционира и во иднина – потенцираше премиерот Мицкоски.