МИЦКОСКИ ИСПРАЌА ПОРАКА ЗА ОБЕДИНУВАЊЕ Потребно е единство за клучните прашања за Македонија

Се побара средба, јас веднаш одговорив, доколку се има некаков план…, за волја на вистината немаше таков план, таква реторика – еве ова е мојот план, чекор еден, два или три. Туку, едноставно побараа вклучување и еден инклузивен процес, рече премиерот Христијан Мицкоски за денешната средба со претседателот на СДСМ Венко Филипче во Владата.

– Ценам дека како политичар и како човек, како најголеми треба да привлечеме од сите слоеви од општеството – и интелектуалци и невладини и политички партии кои што можат да помогнат во одредени процеси – рече Мицкоски во гостување на ТВ Алфа.

Тој истакна дека без оглед на разликите што ги има со Филипче, потребно е единство и обединување за важните прашања за Македонија.

– Јас ценев дека со една ваква средба ќе испратиме порака дека ние политичарите ја научивме лекцијата и дека кон граѓаните треба да рефлектираме порака на обединување, на единство, посебно околу клучните прашања, стожерните прашања. И низ поинаква оптика да ги гледаме работите кога станува збор за таков тип на прашања. А воедно, во услови на траор, во услови на специфична емотивна состојба на населението, да испратиме порака дека политичарите не се оние кои што со ниски страсти на дневна основа комуницираат, со политиканство гледаат да спечалат некаков политички поен. Туку може да се покаже ширина и да се рефлектира таа ширина кон јавноста – рече Мицкоски.

Тој рече дека јавноста ќе суди дали погрешил или направил добар чекор што остварил лидерска средба со претседателот на СДСМ, но смета дека тоа во овој момент тоа во Македонија е потребно.

– На средбата разговаравме за градење на национален консензус за клучните прашања. Тоа е нешто што мене како политичар ми е многу важно. Да седнеме и за клучните теми да се договориме и да немаме дисонантни тонови потоа. Ние можеме да се критикуваме за области за кои треба да има простор за критика – лоши перформанси во економијата, некој злоупотребил нешто.. но кога станува збор за клучните правци, мора да изградиме една култура која што ќе значи единство и консензус. Очекувам и од другите политички партии кои ќе побараат средба, истото да им го предложам. Кога станува збор за клучните прашања сите да бидеме обединети и да изградиме консензус. Филипче кажа дека има разбирање за нашите различни ставови поврзани со уставните измени. Тука имаме принципиелен став, тој ги знае нашите аргументи – рече Мицкоски.

На средбата се разговарало за евентуално вклучување на претставници од СДСМ во одредени реформски процеси, а кои се дел од реформската агенда и планот за раст, како и за градење на национален консензус за суштински прашања.

– Генерално овој процес треба да е инклузивен. СДСМ претходно била 7 години дел од Владата. Имало одредени процеси кои во минатото се случувале, како што се измени во Кривичниот законик кои се носеа во Собрание со злоупотреба на европското знаме. Не гледам причина зошто да не се вклучени, како и другите кои сакаат да бидат вклучени со свои идеи, во насока на вистински реформи – рече Мицкоски.

Прашан како ќе изгледа ваквата соработка на терен, Мицкоски појасни дека може претставник од СДСМ да даде свои забелешки во поглед на содржината на одредени предлог закони.

– Во процес сме на изработка на неколку закони, кои што се дел од реформската агенда, а се однесуваат на правосудството. Во деновите кои следат, ќе имам тематски состанок со Министерството за правда и со луѓето кои се вклучени во тој процес. Не гледам зошто, кога ќе биде готова некоја работна верзија, и претставник од СДСМ да не даде свои забелешки. Низ владина процедура помина и законот за енергетика. Можат и тука да имаат некаков импут, ако ценат дека може да биде подобрена содржината – рече Мицкоски.