МИЦКОСКИ ГО ПРЕДЛОЖИ ГАШИ ЗА ПРЕМИЕР Предвремени избори во мај-јуни

– Во Македонија е потребен нов импулс, нова сила за реформи, една заедничка платформа, обединување околу нов договор со народот и заедничкиот патриотизам за работите кои му се важни на народот, а кои совршено јасно е дека оваа власт не може и нема да ги донесе. Овде секоја наша лична кариера е небитна, кога најважното е иднината на нашата држава. Апелирам на разум, на одлуки кои ќе се базираат на тоа што е најдоброто за државата и народот. Ова е отворен апел до власта за брзи избори, како единствено решение за излез од политичката и економска криза, и наша обврска за борба за нова иднина кон која сите заедно се имаме обврзано – вели Мицкоски.

Тој се осврна и на наследникот на Зоран Заев во СДСМ, Димитар Ковачевски.

– Ова е воедно одлична можност на новиот претседател на СДСМ кој што планира да биде премиер на идната влада, да излезе, да се соочи со граѓаните и да добие каков таков изборен политички легитимитет. Доколку победи на тие избори да ја составува новата Влада, во спротивно засекогаш ќе остане за паметење сликата кога му се поклонува на неговиот претходник Зоран Заев. Има можност да се охрабри и да покаже од каков материјал е направен и да ја побара поддршката од граѓаните. Во спротивно ќе остане секогаш во гнездото во кое што седи Зоран Заев. Време е да ја ставиме Македонија на прво место, судбините на луѓето на Македонија и да покажеме дека можеме, можеме да создадеме заедно нова иднина.

Мицкоски предложи во текот на февруари и март наредната година да се пристапи кон формирање на техничка влада, за да потоа во текот на мај или јуни се одржат предвремени избори.

На брифингот со новинарите, лидерот на ВМРО-ДПМНЕ говореше и за голем број на други горливи прашања во Македонија, нагласувајќи дека во моментов голем проблем имаат жителите на Општина Карбинци, за чие решение очигледно е потребно да се подигне јавното мислење.

– Апелирам до Министерствата за финансии и до транспорт и врски да ѝ помогнат на Општина Карбинци каде надојдената Брегалница го оштети мостот. Луѓето немаат од каде да минуваат, состојбата е алармантна, а нашиот градоначалник наидува на молк кај институциите – посочи тој.

Мицкоски е премногу загрижен од енергетската криза во земјава, за која смета дека ќе чини дополнителни 450 милиони евра, пари кои на крајот ќе ги платат граѓаните.

– Во еден момент на ЕВН и на МЕПСо ќе им недостигаат 235 милиони евра. Тие нема да банкротираат туку тоа ќе го покријат граѓаните. Ова го предвидовме уште во мај, но тогаш никој не сакаше да слуша – посочи лидерот на опозицијата.

Тој откри дека се пронајдени и голем број на неправилности во парцелизирањето на приватното земјиште во повеќе општини, за што рече дека наскоро ќе следува детален извештај.