Мицкоски: Доколку резултатите не се според методологијата на Евростат, нема да ги признаеме

Претседателот на ВМРО-ДПМНЕ Христијан Мицкоски во дебатниот магазин „Click Plus“ на ТВ21 истакна дека тие ќе го признаат само резидентното население во Македонија.

Тој вели дека она што го прави дијаспората сега е едноставно евидентирање.

– Таков тип на резултати ние нема да признаеме, се знае што значи според Евростат и според методологијата што е прифатена попис на население и домаќинства. Ова е евиденција на дијаспора и како евиденција ќе ја третираме. Точно се знае што значи евиденција на дијаспора, точно се знае што значи попис на резидентно население. Јас тоа не го измислувам, тоа е би рекол во првите три реченици во методологијата на Евростат – истакна Мицкоски.

Претседателот на ВМРО-ДПМНЕ додаде дека Маричиќ не може да кажува тој што сака, се знае попис е операција која што се одвива според Евростат методологијата.

– Еве јавно и транспарентно кажувам во вашата емисија дека она што ВМРО-ДПМНЕ и јас ќе го признаеме тоа е населението кое што е резидентно. Односно кое што ќе се попише тука во септември месец помеѓу 5-ти и 30-ти септември. Останатото е дијаспора што се евидентира – рече Мицкоски.

Лидерот на ВМРО-ДПМНЕ додава дека населението кое што е во Македонија е резидентно население и токму тоа е статистичка база, додека пак населението кое е пријавено во друга држава е попишано во тие држави.

– Не можеме тоа население да го попишуваме 13 пати, се знае кое население се попишува – порача Мицкоски.

Претстојните избори кои треба да се одржат кон крајот на месец октомври ќе се реализираат преку отпечаток од прст, а лидерот на ВМРО-ДПМНЕ, Христијан Мицкоски појаснува дека таквите терминали би можеле да гарантираат поголема демократија.

– Тие терминали ќе функционираат офлајн, тоа значи дека ќе имаме еден сервер во определено гласачко место во кој што ќе се содржани отпечатоците од прст од гласачите на тоа место – додава Мицкоски.

Тој во своето гостување рече дека не го оправдува тоа што еден министер, наместо да бара вакцини, шетал низ светот и си играл со чувствата граѓаните.

– Го одбивам таквиот тип на однесување. Имаше таков министер кој се шеташе низ светот, наместо да бара вакцини, и си играше со чувствата на граѓаните. Ако им беше добро, немаше да се иселуваат. Јас не знам само како не чувствуваат малку срам – рече Мицкоски.