Мицкоски до Ламерт: Однесувањето на нашиот источен сосед не е пример за европска вредност

Претседателот на ВМРО-ДПМНЕ Христијан Мицкоски заедно со потретседателот Александар Николоски  денеска остварија средба со Норберт Ламерт новиот директор на Фондацијата „Конрад Аденауер“, соопшти партијата.

На средбата се разговарало за постојната и идна соработка на ВМРО-ДПМНЕ со Фондацијата, како и актуелната политичка состојба во државата, како и предизвиците со кои се соочува Македонија на европскиот пат. Соговорниците нагласиле дека размената на искуства и знаења со Фондацијата е многу значајна за ВМРО-ДПМНЕ, но и за Македонија.

Претседателот на ВМРО-ДПМНЕ срдечно се заблагодарил за досегашната соработка со Фондацијата која е на одлично ниво и истакнал дека истата е од особено значење, особено во периодот кога се соочуваме со предизвици во однос на реформите кои Македонија мора да ги направи за новата Методологија за членство во Европската унија.

Во однос на актуелната политичка состојба во земјава претседателот Мицкоски ги посочи недостатокот на реформи во клучни сектори, економската криза и поразителните економски параметри со кои што се соочуваме, големата невработеност и поразителните политики на владата во справување со здравствената криза.

Тој потенцираше дека е загрозена нашата европска перспектива заради безидејноста и немањето на стратегија за дејствување од страна на надлежните особено на меѓународен план, дека брзата трака за членство во Унијата и реформите не се приоритет на Владата.

Претседателот на ВМРО-ДПМНЕ посочи дека однесувањето на нашиот источен сосед не е пример за европска вредност, но и дека истото е потикнато од политиката на виткање на кичма на премиерот Зоран Заев.