МИЈАЛКОВ НЕ СЕ ПОЈАВИ НА СУДЕЊЕТО ЗА „ТИТАНИК 2″ Кривичен суд тврди дека уредно го поканил

На денешното рочиште за „Титаник 2″ обвинетиот Сашо Мијалков не бил спроведен од затворот во Струга. Од Основниот кривичен суд потврдуваат дека Мијалков не се појавил на судењето и покрај тоа што бил уредно поканет за што судијата пред странките ја покажа испратницата со наредба за спроведување.

Од затворот во Струга не одговориле на прашање од МИА за причината за неспроведувањето на Мијалков.

Управа за извршување на санкции во врска со овој случај најави дека ќе ги преземе сите активности кои се во нејзина надлежност и ќе направи вонреден надзор во установата за утврдување на фактичката состојба.

„Ќе се утврдува одговорност и ќе бидат санкционирани сите кои направиле пропусти, намерни или ненамерни. За извршениот вонреден надзор, јавноста ќе биде дополнително информирана“ – соопшти Управата за спроведување санкции. 

Кривичниот суд во 2019 го осуди поранешниот директор на УБК, Сашо Мијалков за примање награда за противзаконито влијание. Во декември истата година Апелацискиот суд ја укина пресудата поради суштествени повреди на постапката и случајот го врати на повторно судење.

Според обвинението на СЈО, Мијалков преку лидерот на ДПА, Мендух Тачи, нарачал да му наложи на сопартиецот од ДИК, Бедредин Ибраими, да гласа за поништување на регуларно гласање во избирачко место во Струмица, во корист на Васил Пишев од ВМРО-ДПМНЕ, на штета на тогашниот кандидат за градоначалник Зоран Заев.