МЕРКЕЛ НЀ ОДМИНА, НО УРСУЛА ЌЕ ДОЈДЕ Шефицата на Европската комисија доаѓа кон крајот на месецов
За МИА од Европската комисија потврдуваат дека претседателката ќе ги посети сите шест земји од регионот вклучително и Северна Македонија.
Од дипломатските служби во Брисел за МИА потврдија дека претседателката на Европската комисија ќе ја посети и Северна Македонија до крајот на овој месец, јави дописничката на МИА од Брисел.
Шефицата на Европската комисија, Урсула фон дер Лајен, денеска од Стразбур најави дека до крајот на овој месец ќе го посети Западниот Балкан со цел да донесе силна порака на поддршка за приклучување на регионот кон Европската Унија.
За МИА од Европската комисија потврдуваат дека претседателката ќе ги посети сите шест земји од регионот вклучително и Северна Македонија. Посетата ќе се одржи од 28 и 30 септември.
Како што објаснуваат изворите на МИА, во Брисел посетата сѐ уште се подготвува и нема детали за програмата.
Претседателката оваа посета ја организира една недела пред Самитот ЕУ-Западен Балкан кој ќе се одржи на почетокот на октомври во Брдо, Словенија, и чија цел е да се потврди поддршката на ЕУ за регионот како што тоа беше случај со самитот во Софија, а потоа и во Загреб, под бугарско, односно хрватско претседателство.
– Овој самит ќе биде важна прилика не само да се потврди европската перспектива за Западен Балкан и нивната натамошна интеграција, туку и да се даде дополнителен поттик за имплементацијата на економскиот и инвестицискиот план, кој е срцето на нашиот ангажман со регионот – изјавија за МИА од Европската комисија.
Германската канцеларка Ангела Меркел деновиве во својата проштална посета на Западен Балкан, ја прескокна Македонија и во Тирана се сретна со премиерот Зоран Заев.